May 3 - Finding of the Holy Cross, - திருச்சிலுவைக் கண்டெடுக்கப்பட்ட திருநாள்

 

மே 0️3️ம் தேதி

திருச்சிலுவைக் கண்டெடுக்கப்பட்ட திருநாள்

 

            நமதாண்டவர் பாடுபட்டு மரித்த பரிசுத்த சிலுவைக் கண்டெடுக்கப்பட்ட திருநாளை, திருச்சபை இன்று கொண்டாடுகிறது. பெரிய வெள்ளின்று,  சிலுவையானது மனிதர்களுடைய இரட்சணியத்தினுடைய கருவியாக மாற்றப்பட்டதைக் கண்டதும், பசாசினுடைய ஆங்காரம் மிகப் பயங்கரமாகத் தாழ்த்தப்பட்டது!  ஆண்டவருடைய பரிசுத்தப் பாடுகளின் பெரிய வாரத்திற்கான திருவழிபாட்டின்  முன்னுரைஜெபத்தில்,  திருச்சபை “மனுக்குலத்தை ஒரு மரத்தினால் வெற்றிகொண்ட பசாசானவன், ஒரு மரத்தினால் தோற்கடிக்கப்பட்டு மேற்கொள்ளப்பட்டான்” என்று அறிவிக்கிறது! இவ்விதமாக முறியடிக்கப்பட்ட பசாசு,அவனுடைய சீற்றத்தை, பரிசுத்த சிலுவையின் இரட்சணிய மரத்தின் மீது பாயவிட்டான்; பசாசு. சிலுவையை அழித்து நிர்மூலமாக்கியிருப்பான்; ஆனால், அது, அவனுடைய வல்லமைக்கு அப்பாற்பட்டது என்பதை அறிந்தவனாக,அதை அவசங்கைப் படுத்தவும், பார்வையிலிருந்து மறைக்கவும் மாபெரும் முயற்சியில் ஈடுபட்டான்; ஆகவே, அதைப் புதைத்து விடும்படி, யூதர்களை பசாசு தூண்டி ஏவி விட்டான்.

                கல்வாரியின் அடியில், ஆண்டவருடைய கல்லறையிலிருந்து வெகு அருகிலிருந்த மிக ஆழமான ஒரு துளையினுள், ஆண்டவருடைய பரிசுத்த சிலுவையும், அதன் மேல் பொருத்தப்பட்டிருந்த “INRI” என்று பிலாத்துவினால் எழுதும்படி செய்யப்பட்ட தலைப்புப்பலகையும், இரு கள்வர்களின் சிலுவைகளும், எறியப்பட்டன! பின் அந்த துளை, குப்பைகளாலும் மண்ணினாலும் அடைக்கப்பட்டு மூடப்பட்டது.

                நமதாண்டவரை சிலுவையில் அறைந்து நாற்பது வருடகாலத்திற்குப் பிறகு, ஜெருசலேம் நகரம், உரோமையர்களால் அழிக்கப்பட்டது. பின், கல்வாரி மலையின் மேல் உரோமையர்கள் வீனஸ் என்ற அஞ்ஞான தேவதைக்கு ஒரு கோவிலைக் கட்டினர். கி.பி.313ம் வருடம், மகா கான்ஸ்டன்டைன் சக்கரவர்த்தி கிறீஸ்துவராக மனந்திரும்பிய பின், அவருடைய தாயாரான அர்ச். ஹெலன், ஆண்டவர் பாடுபட்டு மரித்த உண்மையான பரிசுத்த சிலுவையைக் கண்டுபிடிப்பதற்காக, ஜெருசலேமுக்கு திருயாத்திரைச் சென்றார்கள்.

நமது தெய்வீக அரசரான திவ்ய சேசுகிறீஸ்துநாதரின் செங்கோல் (சிலுவை)  அதனுடைய கல்லறையிலிருந்து, ஒரு அரச மகிமையுடைய கரத்தினால் வெளியே உயர்த்தப்பட  வேண்டியிருந்தது! நமதாண்டவர், பாடுகளின்போது, எந்த இடத்தில் யூதர்களால் மாபெரும் நிந்தை அவமானங்களாலும், இழிவுகளாலும், தாழ்த்தப்பட்டாரோ, அதே இடத்தில், மகா கான்ஸ்டன்டைனின் தாயாரும்  அர்ச்சிஷ்ட சக்கரவர்த்தினியுமான ஹெலனம்மாள், உலகத்தினுடைய உண்மையான இராஜாதி இராஜாவான  நமதாண்டவருக்குரிய சகல மகிமைகளையும் செலுத்தும்படியாக பரலோகத்தினால் தேர்ந்தெடுக்கப்பட்டார்கள்! கான்ஸ்டன்டைன் சக்கரவர்த்தியின் கட்டளையினால்,வீனஸ் தேவதையின் கோவில் இடித்துத் தரைமட்டமாக்கப்பட்டது! அர்ச். ஹெலனம்மாளின் கட்டளையின்படி, கல்வாரியைச் சுற்றிலுமுள்ள நிலப்பகுதி தோண்டப்பட்டது; மூன்று சிலுவைகளும் கண்டுபிடிக்கப்பட்டன; இம்மூன்று சிலுவைகளில் ஆண்டவருடைய பரிசுத்த சிலுவை எதுவாக இருக்கும் என்பதைப் பரிசோதிக்க அர்ச். ஹெலன், ஒரு சாகப்போகிற நோயாளிப் பெண்ணைக் கூட்டிவரும்படிச் செய்து, மூன்று சிலுவைகளையும் தொடச் செய்தார்கள்; ஆண்டவர் பாடுபட்டு மரித்த பரிசுத்த சிலுவையை அப்பெண் தொட்டபோது,உடனடியாக புதுமையாகக் குணமடைந்தாள். அந்த சிலுவையே, ஆண்டவருடைய சிலுவை என்பதைக் கண்டுபிடித்தார்கள்.

                தமது இரட்சணிய அலுவலின்  மகிமையின் அடையாள சின்னமாகிய சிலுவையின் கொடியை, பூமியிலிருந்து உயர்த்தியதன் மூலமாக,  இந்த அஞ்ஞான உலகத்தின் மீதான தமது வெற்றியை, நமதாண்டவர் இவ்விதமாக நிறைவேற்றி முடித்தார்;  ஆனால் அந்நாள்வரை, யூதர்களுக்கு இடறலாகவும், அவமானச் சின்னமாகவும், அஞ்ஞானிகளுக்கு மடமையாகவும் திகழ்ந்த சிலுவை, இப்போது, ஆண்டவருடைய இரட்சணிய அலுவலின் மகிமையின் சின்னமாக மாறியது! சிலுவை, மனுக்குல இரட்சணியத்தினுடைய மகிமையின் சின்னமாகத் திகழ்கிறது! சிலுவை, கிறீஸ்துவர்களின் மகிமையான அடையாளச் சின்னமாகவும், பாதுகாக்கும் சின்னமாகவும் திகழ்கிறது!

                326ம் வருடம், அர்ச். ஹெலன் ஆண்டவருடைய மெய்யான சிலுவையைக் கண்டுபிடித்தார்கள்; பிலாத்து கட்டளையிட்டிருந்த “INRI” பெயர்ப்பலகை ஆண்டவருடைய சிலுவையில் பொருத்தப்படும்படி அர்ச். ஹெலன் கட்டளையிட்டார்கள்; மேலும், அர்ச். ஹெலன், கல்வாரி மலையில் நமதாண்டவரின் பரிசுத்தப்பாடுகளுக்கும் பரிசுத்த மரணத்திற்கும், அடக்கத்திற்கும்  தோத்திரமாகக் ஒரு பசிலிக்கா தேவாலயத்தைக் கட்டுவித்து, ஆண்டவரின் பரிசுத்த சிலுவையை அதில் ஸ்தாபிக்கும்படிச் செய்தார்கள். இப்பசிலிக்கா தேவாலயம், ஆண்டவருடைய மகிமைமிகு கல்லறையையும், ஆண்டவர் சிலுவையில் அறையப்பட்டு மரித்த ஸ்தலத்தையும், உள்ளடக்கியுள்ளது! இதற்கு அடுத்ததாக ஆண்டவருடைய பரிசுத்த சிலுவை 300 வருட காலம் புதைக்கப்பட்டிருந்த இடத்திலும் ஒரு தேவாலயம் கட்டப்பட்டது; இங்கு நீண்ட தூர நடைபாதை படிக்கட்டுகளால் அமைக்கப்பட்டது! அது, பரிசுத்த சிலுவை புதையுண்டிருந்த ஆழமான ஒரு குகை வரை நீடித்திருக்கும். அந்த குகைதான் பரிசுத்த சிலுவையின் கல்லறையாயிருந்தது.

ஆண்டவரின் பரிசுத்த சிலுவையிலிருந்து, ஒரு பெரிய துண்டை வெட்டியெடுத்து, அர்ச். ஹெலன், புதிய ஜெருசலேமாகிய  உரோமைக்கு அனுப்பி வைத்தார்கள். விலைமதிப்பில்லாத இந்த பொக்கிஷத்தை, மகா கான்ஸ்டன்டைன், உரோமையிலுள்ள செஸ்ஸோரியன் தோட்டத்தில், தான் கட்டியிருந்த ஒரு பசிலிக்கா தேவாலயத்தில் பூஜிதமாக ஸ்தாபிக்கும்படிச் செய்தார். பின்னர் இந்த தேவாலயம், ஜெருசலேமின் பரிசுத்த சிலுவை பசிலிக்கா தேவாலயம் என்று அழைக்கப்படுகிறது.  பின் வந்த எல்லா நூற்றாண்டுகளிலும், ஆண்டவரின் பரிசுத்த சிலுவையிலிருந்து சிறு சிறு துண்டுகள் வெட்டப்பட்டு, கத்தோலிக்க அரசர்களுக்கும், துறவற மடங்களுக்கும் அன்பளிப்பாக அளிக்கப்பட்டன!✝

ஓ! சிலுவையே! எங்கள் ஏக நம்பிக்கையே! வாழ்க! (50 நாள் பலன்)

for Daily Saints History - Click here

August 10 - St. Lawrence, அர்ச்‌. லாரன்ஸ்

 

ஆகஸ்டு 1️0️ம்‌ தேதி

 

உரோமை தலைமை தியாக்கோனும்‌ ஸ்துதியரும் வேதசாட்சியுமான அர்ச்‌.  லாரன்ஸ்‌ திருநாள்‌

 

                இவர்‌, 225ம்‌ வருடம்‌, ஸ்பெயினில்‌, ஹூஸ்கா என்ற இடத்தில்‌ பிறந்தார்‌. இளைஞராயிருந்தபோது, இவர்‌ உயர்கல்வி கற்பதற்காக சரகோசாவிற்கு அனுப்பப்பட்டார்‌; அங்கு தான்‌, இவர்‌ எதிர்காலத்தில்‌ 2ம்‌ சிக்ஸ்துஸ்‌ பாப்பரசராக திருச்சபையை ஆளவிருந்தவரைச்‌ சந்தித்தார்‌; இருவரும்‌, ஸ்பெயினை விட்டு உரோமாபுரிக்குச்‌ சென்றனர்‌. 257ம்‌ வருடம்‌, 2ம்‌ சிக்ஸ்துஸ்‌ பாப்பரசரானதும்‌, லாரன்ஸ்‌, இப்பாப்பரசரிடம்‌, உரோமையின்‌ ஏழு பேர்களில்‌ ஒருவராக தியாக்கோன்‌ பட்டம்‌ பெற்றார்‌. இவர்‌ தலைமை தியாக்கோனாக பொறுப்‌பேற்றார்‌; திருச்சபையின்‌ திரவிய சாலையின்‌ பொறுப்பையும்‌, ஏழைகளுக்கு தர்மம்‌ அளித்துப்‌ பராமரிக்கும்‌ அலுவலையும்‌ கொண்டிருந்‌தார்‌; அச்சமயம்‌, பெர்ஷிய நாட்டில்‌ போரில்‌ ஈடுபட்டிருந்த அஞ்ஞான உரோமைச்‌ சக்கரவர்த்தியான வலேரியன்‌, உரோமாபுரியிலிருக்கும்‌ எல்லா கத்தோலிக்கக்‌ குருக்களையும்‌ கொன்றுபோடும்படியான ஒரு அரச ஆணையை அனுப்பினான்‌; உரோமையிலுள்ள அஞ்ஞான விக்கிரகங்களைப்‌ பாதுகாக்கும்‌ நோக்கத்துடனேயே இந்த அரச ஆணையை அனுப்பியிருந்தான்‌.

                ஏனெனில்‌, அந்நேரம்‌, இதற்கான தீவிரப்‌ பிரச்சாரத்தின்போது வலேரியன்‌, மிக ஆபத்தான துன்பங்களுக்கு ஆளானான்‌; அதன் காரணமாக,அவன்‌ விரைவிலேயே பெர்ஷியர்களால்‌ பிடிக்கப்படவும்‌, அதன்‌ விளைவாக, மரண தண்டனையையும்‌, அடையவும் கூடும்‌ என்கிற ஆபத்தான நிலையிலிருந்தான்‌; வலேரியனுடைய இந்த அரச ஆணையின்‌ உடனடி விளைவாக, 258ம்‌ வருடம்‌, ஆகஸ்டு 6ம்‌ தேதியன்று, 2ம்‌ சிக்ஸ்துஸ்‌ பாப்பரசர்‌, அர்ச்‌. காலிக்ஸ்துஸ்‌ பாப்பரசரின்‌ கல்லறைச்சுரங்கத்தில்‌, திருவழிபாடு நடத்திக்கொண்டிருந்தபோது, கைது செய்யப்பட்டு, வேதசாட்சியாகக்‌ கொல்லப்பட்டார்‌. அதே சமயத்தில்‌, பாப்பரசருடன்‌ கூட அவருடைய தலைமை தியாக்கோனான அர்ச்‌. லாரன்சும்‌ கைது செய்யப்பட்டார்‌; அனால்‌, இவர்‌ திருச்சபையின்‌ திரவியசாலையின்‌ பொறுப்பாளர்‌ என்பதை, உரோமை ஆளுநன்‌ அறிந்தவுடன்‌, இவரிடமிருக்கும்‌ திருச்சபையின்‌ திரவியசாலையை, மூன்று நாட்களுக்குள்‌, தன்னிடம்‌ ஒப்படைத்தால்‌, இவரை உயிருடன்‌ விட்டு விடுவதாகக்‌ கூறினான்‌. அர்ச்‌. லாரன்ஸ்‌ விரைவாக செயல்பட்டு, திருச்சபையின்‌ திரவியத்தை, பணத்தை, ஏழைகளுக்குப்‌ பகிர்ந் தளித்தார்‌; மூன்று நாட்களுக்குப்‌ பிறகு, ஏழைகளையும்‌ முடவர்களையும்‌, உரோமை ஆளுநன்‌ முன்பாகக்‌ கூட்டி வந்து, “இதோ! நான்‌ உங்களிடம்‌ காண்பிப்பதாக வாக்களித்திருந்த திருச்சபையின்‌ பொக்கிஷ திரவியங்கள்,‌ இந்த ஏழைகளிடம்‌ இருக்கிறது! இப்பொக்கிஷங்களுடன்‌ கூட, திருச்சபையின்‌ கிரீடங்களாகத்‌ திகழும்‌, ஏழை விதவைகள்‌, மற்றும்‌ சர்வேசுரனுக்கு அர்ப்பணிக்கப்பட்ட கன்னியர்கள்‌ என்கிற முத்துக்களையும்‌, விலை மதிப்பில்லாத இரத்தினக்கற்களையும்‌ சேர்த்துக்‌ காண்பிப்பேன்‌! திருச்சபை மெய்யாகவே, மிகுந்த செல்வ வளமுடையதாக உங்களுடைய சக்கரவர்த்தியை விட, அதிக செல்வ வளமுடையதாகத்‌ திகழ்கிறது!” என்று கூறினார்‌.

                உரோமை ஆளுநன்‌, இதைக்‌ கேட்டு மிகவும்‌ சீற்றமடைந்தான்‌; அர்ச்‌. லாரன்ஸை, மெதுவாக அதே சமயம்‌, மிகக்‌ கொடிய வேதனை நிறைந்த மரணத்தை அளிக்கும்படியான மரண தண்டனைக்குத்‌ தீர்ப்‌ பிட்டான்‌; அதற்காக, ஒரு பெரிய இரும்புக்கட்டில்‌ தயார்‌ செய்யப்பட்டது; அதன்‌ அடியில்‌ எரியும்‌ கரிகளால்‌, அது,‌ சூடேற்றப்பட்‌டது;அந்த கட்டில்‌ மேல்‌ படுக்க வைத்து, அர்ச்‌.  லாரன்ஸை, உயிருடன்‌ மெதுவாக, வறுத்தெடுக்க உத்தரவிட்டான்‌. பரிசுத்த தியாக்கோன்‌ லாரன்ஸ்‌, சூடேற்றப்பட்டுக்‌ கொண்டிருந்த அந்த இரும்புக்கட்டிலில்‌, கிடத்தப் பட்டு, நீண்டநேரம்‌ தாங்கமுடியாக அந்த சூட்டினால்‌, வறுத்தெடுக்கப்படுகிற மிகப்‌ பயங்கரமான வேதனையை அனுபவித்த பிறகு, “சகோதரரே! என்னுடைய ஒரு பக்கம்‌ நன்றாக வெந்து விட்டது; அடுத்த பக்கமும்‌ நன்றாக வேகும்படியாக, என்னைத்‌ திருப்பிப் போடுங்கள்‌!” என்கிற தனது மிகப்‌ பிரசத்திபெற்ற வாக்கியத்தை, பரலோக மகிழ்ச்சியுடனும்‌, இனிய முகத்துடனும்‌, கொலைஞர்களிடம்‌ கூறினார்‌. பின்‌ பரலோகத்தை நோக்கி, உரோமாபுரியின்‌ மனந்திரும்புதலுக்காக ஜெபித்து வேண்டிக் கொண்டார்‌; அதன்பின்‌ மரித்தார்‌!

                அர்ச்‌. லாரன்சின்‌ வேதசாட்சிய மரணத்தின்‌ இக்‌காட்சியைக்‌ கண்ட உரோமை செனட்டர்களில்‌ அநேகர்‌, மனந்திரும்பினர்‌! அவர்களே, எரிந்துபோன அர்ச்‌. லாரன்சின்‌ பரிசுத்த சரீரத்தை, பக்திபற்றுதலுடன்‌, சுமந்து சென்று, பூஜிதமாக திவோலியினரு கிலிருக்கும்‌, வெரோனா வயல்வெளியிலுள்ள ஒரு குகையில்‌ பூஜிதமாக அடக்கம் செய்தனர்‌. 258ம்‌ வருடம்‌ ஆகஸ்டு 10ம்‌ தேதி,அர்ச்‌. லாரன்ஸ்‌, வேதசாட்சியாக, உயிருடன்‌ சூடேற்றப்பட்ட ஒரு இரும்புக்கட்டிலில்‌ வறுத்தெடுக்கப்பட்டுக்‌ கொல்லப்பட்டார்‌. 

                ஏறக்குறைய நூறு வருடங்களுக்குப்‌ பிறகு, மகாக்‌ கான்ஸ்டன்டைன்‌ பேரரசர்‌, அர்ச்‌. லாரன்சின்‌ கல்லறையின்‌ மேல்‌ ஒரு தேவாலயத்கைக்‌ கட்டினார்‌. பின்னாளில்‌, முதலாம்‌ தமாசுஸ்‌ பாப்பரசர்‌, இத்தேவாலயத்தை சீரமைத்து, பெரிய பசிலிக்கா தேவாலயமாகப்‌ புதுப்பித்துக்‌ கட்டினார்‌. இது தான்‌, சான்‌ லொரன்சோ ஃபுவோரி லே முரா என்று, இக்காலத்தில்‌ அழைக்கப்படுகிற அர்ச்‌. லாரன்ஸ்‌ தேவாலயம்‌.  இந்த தேவாலயத்தில்‌, முதல்‌ வேதசாட்சியாக மரித்த அர்ச்‌. முடியப்பருடைய பரிசுத்த சரீரமும்‌ கூட, பூஜிதமாக ஸ்தாபிக்கப்பட்டி ருக்கிறது! 2ம்‌ பெலாஜியுஸ்‌ பாப்பரசர்‌, இப்பசிலிக்கா தேவாலயத்தைப்‌ புதுப்பித்துக்‌ கட்டியபோது, கான்ஸ்டான்டிநோபிளிலிருந்த அர்ச்‌.  முடியப்பருடைய பரிசுத்த சரீரத்தை, இப்பசிலிக்கா தேவாலயத்திற்கு இடமாற்றம்‌ செய்தார்‌! இந்த பசிலிக்கா தேவாலயத்தில்‌, ஹிலாரியுஸ்‌ பாப்பரசரும்‌ 9ம்‌ பத்திநாதர்‌ பாப்பரசரும்‌ அடக்கம்‌ செய்யப்பட்டிருக் கின்றனர்‌. அர்ச்‌. லாரன்ஸ்‌ கிடத்தப்பட்டிருந்த அந்த பெரிய இரும்புக்கட்டில்‌, லூசினாவில்‌, அர்ச்‌. லாரன்ஸ்‌ தேவாலயத்தில்‌, 2ம்‌ பாஸ்கால்‌ பாப்பரசரால்‌ பூஜிதமாக ஸ்தாபிக்கப்பட்டிருக்கிறது!

                அர்ச்‌. லாரன்ஸ்‌ திருநாளன்று, அர்ச்‌. லாரன்சின்‌ பரிசுத்தத்‌ தலை அடங்கிய அருளிக்கப்பேழை, வத்திக்கானில்‌ பொது வணக்கத்திற்காக வைக்கப்படும்‌!  1557ம்‌ வருடம்‌, ஆகஸ்டு 10ம்‌ தேதி, அர்ச்‌. லாரன்ஸ்‌ திருநாளன்று, அர்ச்‌. குவென்டின்‌ என்ற இடத்தில்‌ நிகழ்ந்த போரின் போது, அடைந்த வெற்றியின்‌ நினைவாக ஸ்பெயின்‌ அரசரான 2ம்பிலிப்‌ அரசர்‌, அர்ச்‌. லாரன்சிற்குத்‌ தோத்திரமாக ஒரு மாளிகையைக்‌ கட்டினார்‌. இக்கட்‌டிடம்‌, அர்ச்‌. லாரன்சிற்கு மகிமையாக அவர்‌ வேதசாட்சியாகப்‌ பாடுபட்டு மரித்த இரும்புக்கட்டில்‌ வடிவத்தில்‌ அமைக்கப்பட்டது! ✝

தியாக்கோனும்‌, வேதசாட்சியுமான அர்ச்‌. லாரன்ஸே! எங்களுக்காக வேண்டிக்கொள்ளும்‌!

June 24 - St. John de Baptist (Birth)

 

ஜுன் 2️4ம் தேதி

நமதாண்டவரின் முன்னோடியான
அர்ச். ஸ்நாபக அருளப்பர் பிறந்த திருநாள்

 

நம் பரிசுத்த தாய் திருச்சபை, ஒவ்வொரு அர்ச்சிஷ்டவரும் மோட்சத்தில் பிறந்த நாளாகிய அவர் பூமியில் இறந்த தினத்தையே,  அவருடைய திருநாளாக அனுசரிக்க வேண்டும் என்கிற விதிமுறையை, இன்று விசேஷ விதமாக விலக்கம் செய்து, நமதாண்டவரின் பரிசுத்த முன்னோடியும்,”இன்னொரு எலியாஸ் தீர்க்கதரிசி!” என்றும், “ஒரு தீர்க்கதரிசியை விட மேலானவர்!” என்றும், “ஆண்டவரின் திருமுகத்தின் முன்பாக அனுப்பப்பட்ட சம்மனசானவர்!” என்றும் அழைக்கப்பட்டவரும், “ஸ்திரீகளிடத்தில் பிறந்தவர்களிலேயே மிகப் பெரியவர்!” என்று நமதாண்டவராலேயே விவரிக்கப்பட்டவருமான அர்ச்.ஸ்நாபக அருளப்பரின் திருநாளை அனுசரித்துக் கொண்டாடுகிறது!

 “ஸ்திரீகளிடத்திலே பிறந்தவர்களுக்குள்ளே ஸ்நாபக அருளப்பரைப் பார்க்கிலும் பெரியவன் ஒருவனும் எழும்பினதில்லையென்று மெய்யா கவே உங்களுக்குச் சொல்லுகிறேன்” (மத் 11:11) என்று நமதாண்டவர் , அர்ச்.ஸ்நாபக அருளப்பரை மிக உயர்வாக பாராட்டிப்புகழ்ந்ததை, சுவிசேஷத்தில் வாசிக்கிறோம். இது, அர்ச்.ஸ்நாபக அருளப்பர் மீது விசேஷ பக்தி பற்றுதலைக் கொண்டிருக்கும்படி, நம்மை ஊக்குவித்து உற்சாகப்படுத்துகிறது!

 அர்ச். ஸ்நாபக அருளப்பர், அவரின் தாயாரான அர்ச். எலிசபெத்தம்மாளின் உதரத்திலிருந்தபோது, மகா பரிசுத்த தேவமாதாவை சந்தித்த அதே மணித்துளி நேரத்திலேயே ஜென்மப் பாவத்திலிருந்து விடுவிக்கப்பட்டு, ஆனந்த அகமகிழ்வின் சந்தோஷத்தால் துள்ளிக்குதித்தார்! (லூக் 1:44).   இது, ஆதித்திருச்சபையின் பொதுவான பாரம்பரிய சத்தியமாக இருக்கிறது, என்று அர்ச்.அகுஸ்தீனார் குறிப்பிடுகின்றார்! அர்ச்.ஸ்நாபக அருளப்பர், தனது தாயாரின் உதரத்திலிருந்தே திவ்ய இஸ்பிரீத்து சாந்துவினால் நிரப்பப்பட்டிருந்தார்!(லூக் 1:15),  என்பது நிச்சயம். ஆதலால், ஜென்மப் பாவம் இல்லாமல் பிறந்தார், என்பதும் நிச்சயமாயிருக்கிறது!

 அர்ச்.ஸ்நாபக அருளப்பர் பிறக்கவிருப்பதைப் பற்றி, அதிதூதரான அர்ச்.கபிரியேல் சம்மனசானவர், அவருடைய தந்தையான அர்ச்.சக்கரியாஸ், தேவாலயத்தில் தூபம் காட்டியபோது, அவருக்கு முன்னறிவித்தார்!

 உலகத்திற்கு வரவிருந்த திவ்ய இரட்சகரும் நமதாண்டவருமான திவ்ய சேசுகிறீஸ்துநாதரின் பாதையை ஆயத்தம் செய்வதே, அர்ச்.ஸ்நாபக அருளப்பரின் முதன்மையான அலுவலாக இருந்தது! நமதாண்டவர்  உலகத்தில் பிறப்பதற்கு முன்னதாகவே, மனுவுருவான திவ்ய சுதனாகிய சர்வேசுரனுக்காக அர்ச்.ஸ்நாபக அருளப்பர் ஜீவிக்கத் துவக்கினார்!

 இவர் பிறந்தபோது, “ஜான்” (அருளப்பர்) என்கிற பெயர் இவருக்கு வைக்கப்பட்டது! இது, எபிரேய மொழியில் “ஜெஹோனான்” என்கிற பெயராக இருக்கிறது.  “சர்வேசுரன் நமக்கு இரக்கத்தைக் காண்பித்திருக்கிறார்!”, என்பது இதன் அர்த்தம்.

 இதன் பிரகாரம், ஜுன் 24ம் தேதியன்று அர்ச்.ஸ்நாபக அருளப்பரின் பிறப்பை திருச்சபை , ஒரு பெரிய திருவிழாவாகக் கொண்டாடுகிறது! அதாவது, நமதாண்டவரை விட, அர்ச்.ஸ்நாபக அருளப்பர் ஆறு மாதம் மூத்தவராக இருக்கிறதால், இவருடைய பிறந்த திருநாள், நமதாண்டவர் பிறந்த தினமான டிசம்பர் 25ம் தேதிக்கு, மிகச்சரியாக ஆறு மாதம் முன்னதாக, அதாவது ஜுன் 24ம் தேதியன்று அனுசரிக்கப்படுகிறது!

 அப்படியென்றால், அர்ச்.ஸ்நாபக அருளப்பர் பிறந்த திருநாள்  ஜுன் 25ம் தேதிக்கு பதிலாக 24ம் தேதி அனுசரிக்கப்படுவது ஏன்? என்கிற கேள்வி வருகிறது. அதற்கான பதில்: உரோமானிய முறைப்படி, ஒரு தேதியை முன்குறிப்பதற்கு, அந்த நாளுக்கு அடுத்து வருகிற மாதத்தின் முதல் நாளிலிருந்து பின்னோக்கிக் கணக்கிடுவது வழக்கமாயிருக்கிறது. அதன்படி, “கிறீஸ்துமஸ்” அடுத்து வருகிற ஜனவரி முதல் தேதிக்கு முன் எட்டாவது நாளாக இருக்கிறது. அதேபோல், ஜுலை மாதத்தின் முதல் தேதிக்கு முன் எட்டாவது நாளாக ஜுன் 24ம் தேதி இருக்கிறபடியால், அந்த நாளையே அர்ச்.ஸ்நாபக அருளப்பருடைய பிறந்த நாளாக நாம் அனுசரித்துக் கொண்டாடுகிறோம்.

 அர்ச். ஸ்நாபக அருளப்பரின் திருநாள் மகா பெரிய திருநாளாக உலகம் முழுவதும் அனுசரிக்கப்பட்டு வருகிறது. இதன் காரணமாகவே, கிபி 841ம் வருடம் ஃபோன்டெனே என்ற இடத்தில் நிகழ்ந்த போரானது, அடுத்த நாளுக்கு (ஜுன் 25) தள்ளிப்போடப்பட்டது!

அர்ச். ஸ்நாபக அருளப்பரே! எங்களுக்காக வேண்டிக்கொள்ளும்!

அர்ச்சிஷ்டவர்களின் சரித்திரம் 31 - அர்ச். இராபர்ட் பெல்லார்மின் (St. Robert Bellarmine)

 ⭐இன்றைய அர்ச்சிஷ்டவர்⭐

 

🇻🇦மே 1️⃣3️⃣ம் தேதி

🌹வேதபாரகரும் கர்தினாலுமான அர்ச். இராபர்ட் பெல்லார்மின் திருநாள்🌹

Feast day          13 May (General Roman Calendar, 1932–1969)

Venerated in   Catholic Church

Title as Saint   Confessor and Doctor of the Church

Beatified           13 May 1923 Rome, Kingdom of Italy by Pius XI

Canonized       29 June 1930 Rome, Vatican City by Pius XI

🌹இவர் இத்தாலியின் டஸ்கனி யிலுள்ள மோந்தெபுல்சியானோவில் , 1542ம் வருடம் பிறந்தார்; இவருடைய தாயார், சினிசியா செர்வினி என்பவர், 2ம் மர்செல்லுஸ் பாப்பரசரின் சகோதரியாவார்.

இவர் சிறுவனாயிருந்தபோது, இத்தாலி யிலும், இலத்தீனிலும் அநேகக் கவிதை கள் எழுதினார்; இவர் எழுதிய பாடல் களில் ஒன்று, அர்ச். மரிய மதலேனம் மாள் பற்றிய பாடல், இது உரோமன் கட்டளை ஜெபப்புத்தகத்தில் சேர்க்கப் பட்டிருக்கிறது.

இவர் சேசுசபை மடத்தில் 18வது வயதில் சேர்ந்தார்; 28வது வயதில், 1570ம் வருடம், குருப்பட்டம் பெற்றார்; புராட்டஸ்டன்டு பதிதர்களின் தாக்குதல் களுக்கு ஏற்ப திருச்சபையின் வேத சத்தியங்களின் விளக்க நூல்களை முறைப்படி தயாரித்து பரப்பினார்;  மிக நெருக்கமாகச் சென்று, புராட்டஸ்டன்டு பதிதங்களைப் பற்றிய கணக்கெடுப்பு ஆய்வை நடத்தினார்; 1592ம் வருடம்,இவர், உரோமன் கல்லூரியின் அதிபரானார்; 1598ம் வருடம், மேற்றிராணிமார்களின் பரிசோதகரானார்; 1599ம் வருடம் கர்தினாலானார். உடனே, 8ம் கிளமென்ட் பாப்பரசர், இவரை தலைமை நீதி விசாரணையாளராக நியமித்தார்; ஜியோடானோ புரூனோ என்ற பதிதனை, அவன் கடைசி வரை பதிதத்தப்பறையிலேயே மூர்க்கனாய் நிலைத் திருந்ததால்,  நெருப்பில் எரிக்கும்படியான தீர்ப்பிற்கு இவர் ஒப்புதல் அளித்தார்; 

1616ம் வருடம், 5ம் சின்னப்பரின் கட்டளைகளின்பேரில், அர்ச். ராபர்ட் பெல்லார்மின், கலிலேயோவை, கோபர்நிகன் தப்பறையைக் கைவிடும்படி கூறினார்; கலிலேயோவும் அதற்கு ஒப்புக்கொண்டார். 

இராபர்ட் பெல்லார்மின் தனது முதிர்ந்த வயதில், மோந்தேபுல்சியானோ வில் மேற்றிராணியாராக நான்குவருட காலம் அலுவல்புரிந்தார்; அதன்பின், உரோமையிலுள்ள அர்ச்.பெலவேந்திரர் சேசு சபைக் கல்லூரியில் இளைப்பாறி ஓய்வெடுக்கும்படி  தங்கியிருந்தார்; இங்கு, 1621ம் வருடம் செப்டம்பர் 17ம் தேதியன்று, 78வது வயதில், அர்ச்.இராபர்ட் பெல்லார்மின் பாக்கியமாய் மரித்தார்.🌹✝

🌹அர்ச்.இராபர்ட் பெல்லார்மினே! எங்களுக்காக வேண்டிக்கொள்ளும்!🌹

🌹அர்ச்.அமலோற்பவ மாமரியே! வாழ்க!🌹

To read more Saints Life - Click Here

To read more Tamil Catholic SOngs Lyrics - Click here

To download Catholic Songs - Click Here

வேதசாட்சியான அர்ச்‌.ஒனேசிமுஸ்‌ - ST. ONESIMUS

வேதசாட்சியான அர்ச்‌.ஒனேசிமுஸ்‌ 

இவர்‌ பிறப்பினால்‌ ஃபிர்ஜியனாகவும்‌, பிலமோன்‌ என்பவரின்‌ அடிமையாகவும்‌ இருந்தார்‌. அர்ச்‌.பிலமோன்‌, என்பவர்‌ ஏற்கனவே அப்‌போஸ்தலரான அர்ச்‌. சின்னப்பரால்‌ கிறீஸ்துவராக மனந்திருப்பப்பட்‌டிருந்தார்‌. 

இவர்‌, தன்‌ எஜமானாகிய பிலோமனிடமிருந்து திருடிவிட்டு, ஓடிப்போனார்‌; பின்‌ எதிர்பாராதவிதமாக, உரோமையில்‌, சிறைபட்‌டிருந்த அர்ச்‌. சின்னப்பரை இவர்‌ சந்திக்க நேர்ந்தது. அர்ச்‌. சின்னப்பர்‌ இவரை மனந்திருப்பி, ஞானஸ்நானம்‌ கொடுத்தார்‌. பின்‌, இவரை,  இவருடைய எஜமானரான அர்ச்‌. பிலமோனிடம்‌ அனுப்பி வைத்தார்‌. அச்சமயம்‌, அர்ச்‌. சின்னப்பர்‌, ஒரு அழகிய கடிதத்தை பிலமோனுக்கு, எழுதி இவரிடம்‌ கொடுத்து அனுப்பினார்‌. அது, சுவிசேஷத்தில், நமக்கு பிலமோனுக்கு எழுதிய நிரூபமாகக்‌ கிடைத்தி ருக்கிறது! அந்த கடிதத்தில்‌, பிலமோனிடம்‌, அவருடைய அடிமையான ஒனேசிமுஸை மன்னிக்கும்படியும்‌ மன்னித்து, அவருடைய உதவியாளராக சேர்த்துக்கொள்ளும்படியும்‌, அர்ச்‌. சின்னப்பர்‌ கேட்டுக்‌ கொள்வதை வாசிக்கிறோம்‌. 

அர்ச்‌. சின்னப்பரின்‌ அறிவுரையின்பேரில்‌, பிலமோன்‌, ஒனேசிமுஸை மன்னித்து, அடிமைத்தனத்திலிருந்து விடுவித்து முழு சுதந்திரத்‌தை அளித்தார்‌; அதன்‌ பின்,‌ தன்‌ ஞான தந்தையான அர்ச்‌.சின்னப்பர்‌ ஏற்கனவே கேட்டுக் கொண்டதன் பேரில்‌, ஒனேசிமுஸ்‌, திரும்பி அப்போஸ்தலரான அர்ச்‌. சின்னப்பரிடமே வந்து சேர்ந்தார்‌.அவருக்கு பிரமாணிக்கத்துடன்‌ ஊழியம்‌ செய்து வந்தார்‌. 

 அர்ச்‌. சின்னப்பர்‌, கொலோசியருக்கு எழுதிய நிரூபத்தை, தீகிக்கு என்பவரிடம்‌ கொடுத்தனுப்பியபோது, அவருடன்‌ ஒனேசிமுஸையும்‌  சேர்த்து அனுப்பி வைக்தார்‌.(கொலொ 4:7-9).  பின்னர்‌, ஒனேசிமுஸ்‌, உரோமாபுரி ஆளுநனால்‌, மிகக்‌ கொடிய உபத்திரவங்களால்‌ சித்ரவதை செய்யப்பட்டார்‌; திருமணம்‌ செய்யாமல்‌ பரிசுத்த ஜீவியம்‌ ஜீவிக்கும்‌ கத்தோலிக்கக்‌ குருத்துவத்தைப்‌ பற்றி இவர்‌ பிரசங்கித்தபோது, அதைக்‌ கேட்டுக்‌ கோபமடைந்த உரோமை ஆளுநன்‌, இவரை சிறையிலடைத்து, 18 நாட்கள்‌ தொடர்ந்து உபாதித்தான்‌: இவருடைய கால்களையும்‌, கைகளையும்‌ குண்டாந்தடியால்‌ அடித்து, முறித்தனர்‌; பின்‌ கல்லால்‌ எறியப்பட்டு கி.பி.95ம்‌ வருடம்‌ வேதசாட்சியாகக்‌ கொல்லப்பட்டார்‌. சர்வேசுரனை சிநேகிக்கிறவர் களுக்குச்‌ சகலமும்‌ நன்மைக்கேதுவாக உதவுகிறதென்று, அறிந்திருக்கிறோம்‌; அவர்கள்‌, தேவ தீர்மானத்தின்படி, அர்ச்சிஷ்டவர்களாக அழைக்கப்பட்டிருக் கிறார்களாமே! (அர்ச்‌.சின்னப்பர்‌ உரோமையருக்கு எழுதிய நிரூபம்‌ 8:28).

அர்ச்‌.ஒனேசிமுஸே! எங்களுக்காக வேண்டிக்கொள்ளும்‌! 

Tamil Catholic Quotes

Tamil Catholic Songs Lyrics

அருட்கருவிகள் - குருத்தோலைகள் (Palm)

 குருத்தோலைகள்

 நன்றி கத்தோலிக்கக் களஞ்சியம், திருச்சி, 1941

நமதாண்டவர் தமது மரணத்துக்குச் சில தினங்களுக்கு முன்பு ஜெருசலேம்! பட்டணத்தின் மகிமையாய் பிரவேசித்ததின் ஞாபகார்த்தமாக, குருத்து ஞாயிற்றுக் கிழமையில் குருத்துக்களை மந்திரித்துக் கொடுக்கிற வழக்கம் ஏற்பட்டது. நமது திவ்விய இரட்சகர் பட்டணத்தை நெருங்கி வரும்போது திரளான ஜனங்கள் அவரை எதிர்கொண்டு வந்தார்கள். அவர்களில் ஒருசிலர் அற்புதமானவரும் புகழ் பெற்ற தீர்க்கதரிசியுமானவரைப் பார்க்க வேண்டுமென்ற வினோதப் பிரியத்தால் வந்தவர்கள். வேறு சிலர் அவருக்குள்ள அற்புத வரத்தைக் காட்டி ஏதாவது புதுமை செய்வாரென்று எண்ணி வந்தவர்கள் இன்னும் சிலர் அவர்மட்டில் விசுவாசங்கொண்டு அவரே வெரு காலமாய் எதிர்ப் பார்க்கப் பட்ட இரட்சகர் என்று அங்கீகரித்தவர்கள்.

ஜனங்கள் கையில் குருத்தோலை பிடித்து, மங்களம் பாடிக்கொண்டு, சேசுநாதர் வரும் வழியில் தங்கள் வஸ்திரங்களை விரித்துச் சங்கைசெய்து, அவரை ஆடம்பரத்துடன் அழைத்துச் சென்றார்கள் என்று சுவிசேஷத்தில் சொல்லியிருக்கிறது. கீழ்த்திசை நாடுகளில் உள்ள ஈந்து ஓலைகள்தான் அவர்கள் கையில் பிடித்திருந்தவை.

ஈந்தோலையின் கருத்து: ஈந்து ஓலை அல்லது குருத்து ஓலை வெற்றிக்கு அடையாளம். சந்தோஷத்தையும் குதூகலத்தையும் காட்டுவதற்கு இதை உபயோகப்படுத்தும் வழக்கம் வெகு சாதாரண மானது. அஞ்ஞான ஜனங்களுள், ஜெயசீலரான தளபதிகளும் வெற்றி வீரரும், ஈந்து ஓலைகளால் தங்களை அலங்கரித்துக் கொண்டு மகிமையாய்ச் செல்வது நீண்டகால வழக்கம். யூதர்கள், கூடாரத் திருநாள் எனப்பட்ட மாசூல் உற்சவத்தைச் சிறப்பிப்பதற்குக் குருத்து ஓலைகளை உபயோகித்தார்கள். கிறிஸ்தவ வழக்கப்படி வேதசாட்சி களின் வெற்றியைக் குறிப்பிடுவதற்குக் குருத்து ஓலை உபயோகிக் கப்படுகிறது. குருத்துக்களுள்ள மரம் நிழழும் கனியும் தருவதின் பொருட்டுத் தேவ பராமரிப்பின் பாதுகாவலையும் அருட் கொடை  யையும் கட்டிக்காட்டும் குறியாய் விளங்குகிறது.

குருத்து ஞாயிற்றுக்கிழமையில் மந்திரிப்பதற்கு மிகவும் தகுதியான ஓலை ஈந்து (ஈச்ச மர) ஓலைதான் என்று சொல்லத் தேவையில்லை. இது அகப்படாத இடங்களில், தென்னங் குருத்துகளை அல்லது ஒலிவக் கிளைகளை உபயோகித்துக் கொள்ளலாம்.

குருத்து மந்திரித்தல்: இந்த சடங்கு எக்காலத்தில் ஆரம்பமாயிற்று என்று திட்டமாய்த் தெரியவில்லை. திருச்சபை பஞ்சாங்கங்களுள் மிகப் பழமையானவைகளிலும் இதர புத்தகங்களிலும் காணக் கிடக்கிற சில குறிப்புகளைக் கவனிக்கும்போது. 5-வது நூற்றாண் டிலேயே இது அனுசரிக்கப் பட்டுவந்ததென்று நினைக்கக் காரண முண்டு, ஆயினும், இதைப்பற்றித் திட்டமான விபரம் சுமார் 700-ம் ஆண்டில் அர்ச். பேதா காலத்தில்தான் காண்கிறோம்.

இந்தச் சடங்கு பெரிய பூசைக்கு முன்பு நடைபெறும். பூசை செய்யப் போகிற குருவானவர் ஊதா  காப்பா (மேலங்கி) அணிந்து, இஸ்ராயேலர் வனாந்தரத்தின் வழியாய் சீனாய் மலைக்குச் சென்ற பிரயாணத்திற் கண்ட பன்னிரண்டு நீரூற்றுகளையும், எழுபது ஈத்து மரங்களையும், சர்வேசுரன் அவர்களுக்கு பரமண்டலத்திலிருந்து மன்னாவென்னும் போஜனத்தை அனுப்புவதாக வாக்களித்ததையும் எடுத்துரைக்கிற பழைய ஆகமத்தின் பாகங்களை வாசிக்கிறார். இதன்பின் நமது ஆண்டவர் ஜெருசலேம் பட்டணத்தில் பிரவேசித்த சம்பவத்தை விவரிக்கிற பாகத்தை அர்ச். மத்தேயு சுவிசேஷத்தி லிருந்து வாசிக்கிறார். இது முடிந்ததும், நமக்கு வெற்றியின் குருத் தோலை கிடைக்கும்படியாக மன்றாடும் ஜெபத்தைச் சொல்லி, குருத்துக்களின் பேரிலும் அவற்றைப் பற்றுதலுடன் வைத்திருப் பவர்கள் பேரிலும் தேவ ஆசிரை மன்றாடி, பேழையிலிருந்த நோவாவிடம் புறா கொண்டு வந்த ஒலிவக்கிளையைக் குறித்தும், குருத்து வெற்றிக்கு அடையாளம் என்பதைச் சுட்டிக்காட்டியும் நேர்த்தியான முகவுரை ஒன்று வாசிக்கிறார் அல்லது பாடுகிறார். சாங்க்துஸ் பாடினபின், ஐந்து வெவ்வேறு ஜெபங்கள் சொல்லி (அர்ச்சியசிஷ்டவாரம் என்னும் புத்தகத்தில் காண்க.) குருத்துகளின் பேரில் மும்முறை தீர்த்தம் தெளித்து மும்முறை தூபங்காட்டிப் பின்னும் ஓர் ஜெபம் சொல்லி முடிப்பார்.

இவ்விதம் மந்திரித்தபிறகு, முதன்முதல் குருக்களுக்கும், அவர்களுக் கொடுப்பார். கிராதியருகில் போய்க் குருத்தை வாங்குவது வழக்கமா யிருந்தாலும், நமது தேவாவயங்களில் ஜனத்திரளின் நெருக்கத்தை முன்னிட்டு, அவ்விதம் செய்ய இயலாததால், ஜனங்கள் இருக்கிற இடத்திலே அவைகளை வாங்கிக்கொள்வது பெரும்பாலும் வழக்க மாயிற்று. பூசை நேரத்தில் நமதாண்டவருடைய பாடுகளின் வரலாற்றை வாசிக்கும் போது, கையில் குருத்துகளைப் பிடித்திருக்க வேண்டும்.

அக்காலத்தில் குருத்தைப் பிடித்துக்கொண்டு ஒரு கோவிலிலிருந்து வேறொரு கோவிலுக்குச் சுற்றுப்பிரகாராமாய் சென்று, இரண்டாவது கோவிலில் பூசை காண்பது வழக்கமாயிருந்தது. இக்காலத்தில் ஒரே கோவிலைச் சுற்றி வருகிறோம். அச்சமயத்தில் குருத்தைப் பிடித்துக் கொண்டு, நமதாண்டவரை ஜெருசலேம் பட்டணத்துக்குள் ஆடம்பர மாய் அழைத்துச் சென்ற சம்பவத்தை ஞாபகப்படுத்தி, மோட்சமாகிய ஜெருசலேம் நகருக்கு நாம் போய்ச்சேரும் வரத்தை ஆண்டவர் நமக்கு அளித்தருளும்படி மன்றாடுவோமாக!

குரு தூபக்கலசத்தில் சாம்பிராணியைப் போட்ட பிறகு: “ஆண்டவரே, நீர் ஈசோப் என்கிற புல்லினால்" என்று துவங்கும் ஆரம்ப வாக்கியத்தை மட்டும் சொல்லிக்கொண்டு தீர்த்தத்தால் மும்முறை குருத்தோலைகளின்மேல் தெளித்து, மும்முறை தூபம் காட்டுகிறார்.

செபம்

சர்வேசுரா, தேவரீருடைய திருக்குமாரனும் எங்கள் ஆண்டவருமான சேசு கிறீஸ்துநாதரை எங்களுடைய இரட்சண்யத்தின் பொருட்டு அவர் எங்களிடமாய்த் தம்மைத் தாழ்த்தி, எங்களைத் தேவரீரிடத்தில் மீளவும் சேர்க்கும்படி இவ்வுலகத்திற்கு அனுப்பினீரே: அவர் வேதாகமங்கள் நிறைவேறும் பொருட்டு ஜெருசலேமிற்கு எழுந்தருளினபோது. திரளான விசுவாசிகள் மிகுந்த பற்றுதலுள்ள பக்தியோடு தங்களுடைய வஸ்திரங்களையும் குருத்தோலை களையும் அவரது பாதையில் விரித்தார்களே: நாங்களும் அவருக்கு விசுவாசத்தின் பாதையை ஆயத்தஞ் செய்யவும், இடறும் கல்லும், துர்மாதிரிகையின் பாறையும் அப்பாதையிலிருந்து அப்புறப்படுத்தப் பட்டு, உமது திவ்விய சமூகத்தில் எங்களுடைய நற்கிரியைகள் நீதியென்னும் கிளைகளை விட்டுத் தழைக்கவும். நாங்கள் அவருடைய திருப்பாதச் சுவடுகளை பின்செல்ல அருகராகவும் அநுக்கிரகஞ் செய்தருளத் தேவரீரை மன்றாடுகிறோம். தேவரீரோடு இஸ்பிரீத்துசாந்துவின் ஐக்கியத்தில் சர்வேசுரனும், சதாகாலமும் சீவியரும் இராச்சிய பரிபாலனஞ் செய்கிறவருமாயிருக்கிற உமது திருக்குமாரனும் எங்கள் ஆண்டவருமான சேசு கிறீஸ்துவின் பேரால் ஆமென்.