febru🥳8

பிப்ரவரி 08ம் தேதி

அர்ச். தமதிரித்துவ சர்வேசுரனின் டிரினிடேரியன் துறவற சபை ஸ்தாபகரான அர்ச். மாத்தா அருளப்பர் திருநாள்

அருளப்பர், 1160ம் ஆண்டு பிரான்சில் ஃபோகன் தே பார்சலெனோட்டே என்ற இடத்தில் பிறந்தார். 32வது வயதில் குருவானார். 1193ம் ஆண்டு, ஜனவரி 28ம் தேதி, முதல் திவ்யபலிபூசை நிறைவேற்றினார். அப்போது, ஒரு சம்மனசானவர் சங்கிலிகளால் கட்டுண்டிருக்கும் கிறிஸ்தவ அடிமை மற்றும் ஒரு மகமதிய அடிமையை தமது கரத்தில் பிடித்திருப்பதை காட்சியாக கண்டார்.

அந்த காலத்தில், கிறிஸ்தவர்கள் மற்றும் மகமதியர்கள் இடையே சிலுவைப்போர் நடைபெற்றுக் கொண்டிருந்தது. திவ்யபலிபூசை முடிந்ததும், மகமதியரிடமிருந்து கிறிஸ்தவ அடிமைகளை மீட்டெடுப்பதற்காக, தனது வாழ்நாளையே அர்ப்பணிக்கத் தீர்மானித்தார்.

அருளப்பர், பிரான்சின் செஃப்ரோய்டு நகரில் அர்ச். வாலோய்ஸ் ஃபெலிக்ஸின் ஆன்ம வழிகாட்டுதலை நாடினார். மகமதியரிடமிருந்து கிறிஸ்தவ அடிமைகளை மீட்பதற்காக, தனி துறவற சபையை உருவாக்க திட்டமிட்டார். இந்த திட்டத்தால் ஈர்க்கப்பட்ட அர்ச். ஃபெலிக்ஸும் அவருடன் சேர்ந்தார்.

1198ம் ஆண்டு, அருளப்பர் உரோமாபுரிக்குச் சென்று, பாப்பரசரின் அனுமதி பெற முயன்றார். 3ம் இன்னசன்ட் பாப்பரசர், லாத்தரன் தேவாலயத்தில் திவ்யபலிபூசை நிறைவேற்றியபோது, அருளப்பர் கண்ட அதே காட்சியை அவர் கண்டார். பிறகு, பாப்பரசர், இந்த புதிய துறவற சபையை அங்கீகரித்து, அருளப்பரை அதன் முதல் பொது அதிபராக நியமித்தார்.

"மகா பரிசுத்த தமதிரித்துவத்தின் துறவற சபை" என்று அழைக்கப்பட்ட இச்சபை உறுப்பினர்கள், சிவப்பு மற்றும் நீல நிற சிலுவையுடனான வெண் அங்கியை அணிய வேண்டும் என விதிமுறைகள் ஏற்படுத்தப்பட்டன. அருளப்பர், அர்ச். ஃபெலிக்ஸுடன் பிரான்சுக்குத் திரும்பி, பிலிப் 2ம் அகஸ்டஸ் அரசரின் அனுமதியுடன் பல மடங்கள் நிறுவினர்.

இந்த துறவற சபையினர், ஸ்பெயின், மொராக்கோ, தூனிஸ் போன்ற நாடுகளுக்கு சென்று, கொடுமைப்படுத்தப்பட்ட கிறிஸ்தவ அடிமைகளை பணய தொகை செலுத்தி மீட்டனர். இந்த பணத்தொகையை, ஐரோப்பிய நாடுகளில் இருந்து நன்கொடையாக திரட்டினர்.

அருளப்பர், இறப்பதற்கு முன் அர்ச். பிரான்சிஸ் அசிசியாரை சந்தித்தார். 1213ம் ஆண்டு, டிசம்பர் 17ம் தேதி, உரோமாவில் மரணமடைந்தார். 1655ம் ஆண்டு, இவரின் பரிசுத்த அருளிக்கங்கள் ஸ்பெயின் நகரமான மாட்ரிட் நகருக்கு மாற்றப்பட்டன. 1666ம் ஆண்டு, இவருக்கு அர்ச்சிஷ்டப்பட்டம் வழங்கப்பட்டது.

1599ம் ஆண்டு, டிரினிடேரியன் துறவற சபை, அர்ச். உற்பவத்தின் பாப்டிஸ்ட் அருளப்பர் என்பவரால் சீர்திருத்தப்பட்டது.

சிந்தனை:

நமதாண்டவர் தமது திவ்ய உயிரையே நமக்காக முழுமையாகக் கையளித்ததைப் பின்பற்றி, பிறரை மீட்பதற்காக தன்னையே அர்ப்பணித்த அர்ச். மாத்தா அருளப்பரைப்போல், நாமும் பிறருக்காக, அவர்களின் இரட்சணியத்திற்காக வாழ்வோமாக!

அர்ச். மாத்தா அருளப்பரே! எங்களுக்காக வேண்டிக்கொள்ளும்!

அர்ச். அமலோற்பவ மாமரியே! வாழ்க!