November 24. - St. John of the Cross

நவம்பர்‌ 24ம் தேதி

காட்சி தியானியும், ஸ்துதியரும், வேதபாரகருமன

அர்ச்‌. சிலுவை அருளப்பர்‌ 

ஜூவான்‌ தே யெப்பெஸ்‌ ஆல்வாரெஸ்‌,1542ம்‌ வருடம்‌,ஜூன்‌ 24ம்‌ தேதி,ஸ்பெயின்‌ நாட்டிலுள்ள ஃபோன்டிவெரோஸ்‌ என்ற இடத்தில்‌ பிறந்தார்‌. பிரான்சிஸ்‌ தே யெப்பெஸ்‌ என்ற ஸ்பெயின்‌ நாட்டின்‌ உயர்குடியைச்‌ சேர்ந்த பிரபுவின்‌ மகனாக அருளப்பர்‌ பிறந்தார்‌. ஸ்பெயினிலுள்ள மெதீனா தே காம்போஸ்‌ என்ற நகரிலுள்ள கார்மெல்‌ மடத்தில்‌,1563ம்‌ வருடம்‌,அருளப்பர்‌,தன்‌ 23வது வயதில்‌,இளந்துறவியாகச்‌ சேர்ந்தார்‌,1567ம்‌ வருடம்‌,25வது வயதில்‌ குருப்பட்டம்‌ பெற்றார்‌. 1568ம்‌ வருடம்‌,கார்மெல்‌ சபையின்‌ புகழ்பெற்ற காட்சி தியானியான அர்ச்‌.அவிலா தெரசம்மாள்‌,கார்மெல்‌ சபையின்‌ ஆரம்பகால கண்டிப்பான தபசுகளின்‌ விதிமுறைகளை மறுபடியும்‌ அனுசரிக்கும்படியாக,கார்மெல்‌ சபையினுள்‌ கொண்டு வரும்படியாக,கார்மெல்‌ சபையை சீர்திருத்தும்‌ அலுவலில்‌ அர்ச்‌. சிலுவை அருளப்பருடைய உதவியுடன்‌ ஈடுபட்டார்கள்‌. 

1569ம்‌ வருடம்‌,டூரூவெலோ என்ற இடத்தில்‌,அர்ச்‌.சிலுவை அருளப்பர்‌,முதல்‌ சீர்திருத்தப்பட்ட கார்மெல்‌ சபை மடத்தைத்‌ துவக்கினார்‌. ஆனால்‌ இவர்‌,அர்ச்‌.அவிலா தெரசம்மாளுடன்‌ சேர்ந்து கொண்டு வந்த சீர்திருத்தத்தினால்‌,கார்மெல்‌ துறவற சபையினுள்‌ துறவியரிடையே உட்பூசல்‌ ஏற்பட்டது. அதன் காரணமாக 1576ம்‌ வருடம்‌,இவரை சிறை வைத்தனர்‌. 1577ம்‌ வருடம்‌,அர்ச்‌. சிலுவை அருளப்பரை,டொலடோவில்‌ மறுபடியும்‌ ஒரு இருண்ட அறையில்‌ அடைத்து வைத்தனர்‌. அங்கு தான்‌,அர்ச்‌.சிலுவை அருளப்பர்‌,உலகப்புகழ் பெற்றதும்‌,இவருடைய மிகச்சிறந்‌தவையுமான காட்சிதியானக்‌ கட்டுரைகள்‌ அல்லது ஞானப்‌ பாடல்களை,எழுதினார்‌: “ஆத்துமத்தின்‌ உன்னத சங்கீதம்”‌ஆத்துமத்தின்‌ இருண்ட இரவு”சிநேகத்தினுடைய உயிருள்ள சுவாலை” ஆகிய ஞான சங்கீதங்களை எழுதினார்‌.

“ஆத்துமத்தின்‌ இருண்ட இரவு” என்கிற தனது காட்சிதியானக்‌ கட்டுரையில்,ஆத்துமமானது,சகலத்தின்‌ மீதும்‌ கொண்டிருக்கும்‌ சகல பற்றுதல்களையும் ஒவ்வொன்றாகத்‌ துறந்துவிட்டு சகலத்தையும்‌ கடந்து,இறுதியாக எவ்வாறு,நமதாண்டவர்‌ சிலுவையில்‌ அறையப்பட்டதையே அதனுடைய இறுதி மகிமையாக,அனுபவிக்கிறது,என்பதைப்‌ பற்றி விவரிக்கின்றார்‌. எட்டு சரணங்களுடைய பாடலாக இதை இயற்றியிருக்கிறார்‌.தன்‌ மகா நேசமானவருடன்‌ ஒன்றிணைந்து ஐக்கியமாவதற்கு முன்பாக, விசுவாசத்தினுடைய இருண்ட இரவைக்‌ கடந்து செல்லும்போது தான்‌, கொண்டிருந்த பாக்கியமானதும்‌ துணிகரமானதுமான வீரத்துவத்தைப்‌ பற்றி,ஆத்துமம்‌ பாடுகிற பாடலாக இதை எழுதியுள்ளார்‌. 1568ம் ‌வருடம்‌,ஆகஸ்டு மாதம்‌ அருளப்பர்‌ சிறையிலிருந்து புதுமையாக வெளியேறி தப்பிச்‌ சென்றார்‌. பின்னாளில்‌ 1585ம்‌ வருடத்திலிருந்து 1587ம்‌ வருடம்‌ வரை, இவருக்கு ஆண்டலூசியா பிராந்தியத்தின்‌ கார்மெல்‌ துறவற சபையில்‌ உதவி பொதுதலைமை அதிபர்‌ பதவி அளிக்கப்‌ பட்டது. இவருடைய இறுதி காலத்தில்‌,மறுபடியும்‌,சீர்திருத்தப்பட்ட கார்மெல்‌ சபைத் துறவியரிடையே கருத்து வேறுபாடும்‌ பிரிவினையும்‌ ஏற்பட்டது,அர்ச்‌.சிலுவை அருளப்பர்‌ தனிமையில்‌ ஜெப தபத்தில்‌ ஈடுபட்டு முழுமையான ஏகாந்த ஜீவியம்‌ ஜீவித்தார்‌. உபேடா என்ற இடத்தில்‌ 1591ம்‌ வருடம், டிசம்பர்‌ 14ம்‌ தேதியன்று,தன்‌ 49வது வயதில்‌,அர்ச்‌. சிலுவை அருளப்பர்‌ பாக்கியமாக மரித்தார்‌. செகொவியா நகரில்‌ அடக்கம்‌ செய்யப்பட்டார்‌.1726ம்‌ வருடம்‌ இவருக்கு அர்ச்சிஷ்டப்‌ பட்டம்‌ அளிக்கப்பட்டது.இவருடைய பரிசுத்த சரீரம்‌ அழியாத சரீரமாக இந்நாள்‌ வரை வணங்கப்பட்டு வருகிறது. 11ம்‌ பத்திநாதர்‌ பாப்பரசர்‌,1926ம்‌ வருடம்‌,இவரை திருச்சபையின்‌ வேதபாரகராகப்‌ பிரகடனம்‌ செய்தார்‌. மாபெரும்‌ கத்தோலிக்கக்‌ காட்சி தியானிகளில்‌ மிகச்சிறந்த காட்சி தியானியாகவும்‌, ஞான சங்கீதங்கள்‌ எழுதும்‌ இஸ்பானிய கவிஞர்களில்‌ மிகச்சிறந்த கவிஞராகவும்‌,அர்ச்‌.சிலுவை அருளப்பர்‌ திகழ்கின்றார்‌. திருச்சபையின்‌ மிகச்‌ சிறந்த வேதபாரகராகவும்‌,இஸ்பானிய தேசத்தின்‌ துறவற மடங்களின்‌ சீர்திருத்தவாதியாகவும்‌,சீர்திருத்தப்பட்ட கார்மெல்‌ சபையின்‌ தியான துறவற சபையின் ‌இணை ஸ்தாபகராகவும்‌ திகழ்கின்றார்‌.

ஸ்துதியரும்,காட்சிதியானியும்,வேதபாரகருமானஅர்ச்‌.சிலுவை அருளப்பரே! எங்களுக்காக வேண்டிக்கொள்ளும்‌

அர்ச்சிஷ்டவர்களின் சரித்திரம் 20 - வேதசாட்சியான அர்ச்.வெரோனா நகர் இராயப்பர்

ஏப்ரல் 29ம் தேதி

வேதசாட்சியான அர்ச்.வெரோனா நகர் இராயப்பர் திருநாள்

இவர் 1206ம் வருடம் வட இத்தாலியிலுள்ள வெரோனா நகரில் பிறந்தார்; இச்சமயம் இப்பகுதியில் கத்தாரியப் பதிதத் தப்பறை வெகுவாக பாதிப்பை ஏற்படுத்தியிருந்தது; இவர் கத்தோலிக்கப் பள்ளிக் கூடத்தில் கல்வி பயின்றார்; பின்னர், பொலோஞா பல்கலைக் கழகத்தில் உயர்கல்வி கற்றார்.

1221ம் வருடம், இவர் தனது 15வது வயதில், அர்ச்.சாமிநாதரை சந்தித்தார்; அர்ச்.சாமிநாதரின் துறவற சபையில் சேர்ந்தார்; வட இத்தாலியிலும்  மத்திய இத்தாலியிலும் இவர் புகழ்பெற்ற பிரசங்கி யாராகத் திகழ்ந்தார். பதிதத் தப்பறைகளுக்கு எதிராக, விசேஷமாக வட இத்தாலியில் அநேக மனிதர்களை தன் வசப்படுத்தியிருந்த கத்தாரியப் பததித்தப்பறையை எதிர்த்து கத்தோலிக்க ஞானப் பிரசங்கத்தை நிகழ்த்தினார்; 9ம் கிரகோரி பாப்பரசர்,1234ம் வருடம், இவரை வட இத்தாலியின் பொது தலைமை நீதி விசாரணையாளராக நியமித்தார். இவர், உரோமாபுரி, ஃபுளாரன்ஸ், பொலோஞா, ஜெனோவா, கோமோ என்ற நகரங்களுக்கும் , இத்தாலி முழுவதும் சுற்றித் திரிந்து, சுவிசேஷத்தைப் பிரசங்கித்தார். 1243ம் வருடம் புதிதாக , துவங்கிய மகா பரிசுத்த தேவமாதாவின் ஊழியர்கள் துறவற சபையை ஏற்படுத்துவதற்கான பாப்பரசரின் அனுமதியைப் பெறுவதற்காக, இவர் பரிந்துரை செய்தார்.

1251ம் வருடம், 4ம் இன்னசென்ட் பாப்பரசர் , இவருடைய புண்ணியங் களுடையவும், கடின தபசினுடையவும் ஜீவியத்தைப்பற்றியும், இவர் கற்றறிந்த வேத இயலின் அறிவைப் பற்றியும், இவருடைய பிரசங்கம் செய்யும் திறனைப் பற்றியும், கத்தோலிக்க வேத விசுவாசத்தின் மீது இவருடைய இருதயத்தில் பற்றியெரிந்த ஆர்வத்தைப் பற்றியும், அறிந்தவராக, இவரை லொம்பார்டியில் நீதி விசாரணையாளராக ஏற்படுத்தினார். இந்த அலுவலில், இவர் ஆறு மாத காலம், அயராமல் ஈடுபட்டிருந்தார்.

இவர் தனது பிரசங்கங்களில், பதிதத் தப்பறைகளையும், வார்த்தையால் கத்தோலிக்க விசுவாசத்தை ஏற்றுக் கொண்டவர் களாக, ஆனால், அதே சமயம்,அதற்கு எதிராக பதிதத்தப்பறையில் ஜீவிக்கிற கத்தோலிக்கர்களையும் இவர் மிகக் கடுமையாகக் கண்டித்தார். மக்கள் கூட்டம் கூட்டமாக இவரைச் சந்தித்தனர்; இவரைப் பின்பற்றினர்; ஏராளமான மனந்திரும்புதல்கள் நிகழ்ந்தன! அநேகக் கத்தாரிய பதிதர்களும் மனந்திரும்பி, கத்தோலிக்க வேதத்திற்குத் திரும்பி வந்தனர்.

இவர் அடிக்கடி அர்ச்சிஷ்டவர்களுடன் உரையாடும் பாக்கியத்தைப் பெற்றிருந்தார்; ஒருநாள், வேதசாட்சிகளாக மரித்த பரிசுத்த கன்னியர் களான அர்ச். கத்தரீனம்மாள், அர்ச். ஆக்னசம்மாள், அர்ச். செசிலியம்மாள் ஆகியோருடன் உரையாடிக் கொண்டிருந்தார். இச் சமயம், இவருடைய அறையைக் கடந்து சென்ற ஒரு துறவி, மடத்தின் அதிபரிடம், பெண்கள் சிலருடன் இவர் அறையில் பேசிக் கொண்டிருப்பதாக, இவரைப் பற்றி புகார் செய்தார். உடனே, அதிபர் இதைப் பற்றி, இவரிடம் எதுவும் கேட்காமல், எந்த தயக்கமும் இல்லாமல், இவரை ஒரு மடத்திற்கு அனுப்பி, அங்கு எந்த பிரசங்கமும் செய்யக்கூடாது என்று தண்டித்தார்.

அதிபர் இட்ட இக்கட்டளைக்கு, இவர் தாழ்ச்சியுடன் உடனே கீழ்ப்படிந்தார்; ஆனால், பாடுபட்ட சுரூபத்தில், சிலுவையில் அறையுண்டிருக்கும் நேச ஆண்டவரை நோக்கி ஜெபித்தபோது , தன்னுடைய அவப்பெயரினால், அவரைக் கை நெகிழ்ந்ததாகக் கூறி தன்னைப் பற்றியே, முறையீடு செய்தார். உடனே, பாடுபட்ட சுரூபத்திலிருந்த ஆண்டவர், இவரை நோக்கி, “பீட்டர்! நான் கூட மாசற்றவராக இல்லையா? மாபெரும் துயரங்களை சந்தோஷத்துடன் துன்புற என்னிடமிருந்து கற்றுக் கொள்!” என்று கூறினார். இறுதியாக இவருடைய மாசற்றதனம் அதிபரால் கண்டுபிடிக்கப்பட்டது! இவருடைய பங்கிற்கு, இந்த ஏகாந்தத்தின் காலத்தில், இவர் நிந்தனையையும், தாழ்வாக நடத்தப்படுதலையும், நேசிக்கக் கற்றுக் கொண்டார். மறுபடியும், இவர் பிரசங்கிப்பதில் ஈடுபட்டார்; இவர் அறிவுறுத்திக்கூறிய பிரசங்கங்களுடன் புதுமைகளும் நிகழ்ந்தன! இத்தாலி முழுவதும் பயணத்தை மேற்கொண்ட இவர் நாடெங்கிலும் புகழ்பெற்றார்.

ஒருசமயம் இவர் மிகப் பெரிய கூட்டத்தில் பிரசங்கம் நிகழ்த்தியபோது, வெயில் மிக உக்கிரமமாக இருந்தது;  பதிதர்கள் இவரைநோக்கி நிழலைக் கொண்டு வரும்படி கூக்குரலிட்டனர்; இவர் அதற்காக ஜெபித்தார்; உடனே, இவர் பிரசங்கத்தைக் கேட்ட மக்கள் கூட்டத்தின் மீது ஒரு மேகம் புதுமையாக நிழலிட்டது!

ஒவ்வொரு நாளும் நடுப்பூசையின் போது, “ஆண்டவரே! தேவரீர் எனக்காக மரித்ததால், நானும் தேவரீருக்காக இறந்துபோவதற்கான வரத்தை எனக்கு அருளும்” என்று உருக்கமாக ஜெபித்து வேண்டிக்கொண்டு வந்தார். இவருடைய ஜெபம் கேட்கப்பட்டது.

1522ம் வருடம் மிலான் நகரைச் சேர்ந்த கத்தாரிய பதிதத்தைச்சேர்ந்த ஒரு கூட்டத்தினர், அர்ச்.பீட்டரைக் கொல்ல சதித்திட்டமிட்டனர்.  ஒருசமயம், கோமோவிலிருந்து மிலானுக்குத் திரும்புகிற சமயத்தில்,  கொலைகாரர்கள் இவரைப் பின்தொடர்ந்து வந்தனர். பார்லாசினா என்ற இடத்தில் அர்ச்.பீட்டர், சக துறவியான டோமெனிகோவுடன் தனியாக வந்தபோது, ஒரு கோடரியால் இவருடைய தலையில் ஒரு வெட்டு வெட்டினர்! இவருடைய சக துறவியை அடித்து சாவுக்குரிய காயத்தை ஏற்படுத்தினர். கீழே விழுந்த அர்ச்.பீட்டர்,  எழுந்து முழங்காலிலிருந்தபடி, அப்போஸ்தலர் களின் விசுவாசப் பிரமாணத்தை ஜெபித்தபடி, தனது இரத்தத்தை சர்வேசுரனுக்குக் காணிக்கையாக பலி செலுத்தும்விதமாக, தனது விரல்களை தன் இரத்தத்தில் நனைக்கும்படியாக, மூழ்கச் செய்து எடுத்து, அதனால் தரையில் நிசே விசுவாசப்பிரமாணத்தின் “ஒரே சர்வேசுரனை விசுவசிக்கிறேன்,” என்கிற முதல்  வாக்கியத்தை "Credo in Unum Deum",  என்று இலத்தீனில் எழுதியபடியே மரித்தார். அந்தகோடரியின் வெட்டு, அர்ச். வெரோனா நகர் இராயப்பரின் தலை உச்சியைத் துண்டித்திருந்தது. இரத்தம் அதிலிருந்து பிரளயமாக தரையில் வழிந்தோடியது.இவருடைய சக துறவி டோமெனிகோ, மேதா என்ற இடத்திலுள்ள மருத்துவமனைக்கு எடுத்துச் செல்லப் பட்டார்; அங்கு இவர் 5 நாட்களுக்குப் பின் மரித்தார்.

கத்தாரியப் பதிதம் என்றால் என்ன?

இத்தப்பறையானது, கெட்ட கடவுளால் உலகம் படைக்கப்பட்டது என்றும்,உலகத்தில் காணப்படுகிற யாவற்றையும், கெட்ட கடவுள் நல்ல கடவுளிடமிருந்து அபகரித்துக் கொண்டு அவற்றை உலகத்தில் விட்டிருக்கிறதாகவும், மனிதர்களுடைய சரீரங்களுக்குள் இருக்கிற ஆவி, நல்ல கடவுளிடம் திரும்பிச் செல்ல வேண்டியிருக்கிறது என்றும், யாராவது மரித்தால், அவர்களுடைய ஆவியை  ஒரு புதிய உடம்பினுள் கெட்ட கடவுள் செலுத்திவிடும் என்றும்,இது அந்த ஆவியின் மறு ஜென்மப் பிறப்பு என்றும்  இத்தொடர் பிறப்புகளிலிருந்து தப்பிக்க துப்புரவுப்படுத்துகிற ஒரு சடங்கு செய்ய வேண்டும் என்றும் அபத்தமான போதனைகளைக் கொண்டிருக்கிறது. மேலும் பாவம்  உண்டு! என்கிற நம் வேத சத்தியத்தை இப்பதிதர்கள் ஏற்றுக் கொள்ள மாட்டார்கள்.

அர்ச்.வெரோனா நகர் இராயப்பரே! எங்களுக்காக வேண்டிக் கொள்ளும்

To Read about more saints : Click Here