August 9 - St. Romanus - அர்ச்‌. ரோமானுஸ்

 

ஆகஸ்டு 0️9ம்‌ தேதி     

வேதசாட்சியான அர்ச்‌.  ரோமானுஸ்‌ திருநாள்

‌

   உரோமையின்‌ பரிசுத்த தியோக்கோனான அர்ச்‌. லாரன்ஸை உரோமை சக்கரவர்த்தியான வலேரியன்‌, நீதிவிசாரணை செய்யும்போதும்‌, அவரைக்‌ கொடூரமாக சித்ரவதை செய்து, உபத்திரவப்படுத்திய போதும்‌, உரோமை இராணுவ வீரராக, அங்கிருந்து அர்ச்‌. லாரன்ஸை உற்றுக்‌ கவனித்துக்‌ கொண்டிருந்த உரோமைப்‌ படைவீரர்‌ தான்‌, அர்ச்‌. ரோமானுஸ்‌.

                பரிசுத்த வேதசாட்சியான அர்ச்‌. லாரன்ஸ்‌ அனுபவித்த கொடிய உபத்திரவங்கள்‌ மத்தியில்‌,கொண்டிருந்த பரலோக சந்தோஷத்தையும்‌, சுபாவத்திற்கு மேற்பட்ட நீடித்த பொறுமையையும்‌, தன் துன்ப உபத்திரவத்தைப்‌ பற்றிய எந்த முறையீடுமில்லாத முழுமையான மவுனத்தையும்‌ கண்டு, அவரைக்‌ கண்காணித்து வந்த உரோமைப் படை வீரரான ரோமானுஸ்‌ பெரிதும்‌ ஆச்சரியத்துடன்‌, திகைப்பில்‌ ஆழ்ந்தார்‌. இரத்தமும்‌ சரீரமும்‌ உள்ள ஒரு மனிதரால்‌, இவ்வளவு கொடிய சித்ரவதையை எவ்வாறு பொறுமையுடன்‌ ஏற்று, ஒரு முறையீடும்‌ செய்யாமல்‌ இருக்கக்கூடும்‌? என்பதைப்‌ பற்றிப்‌ புரிந்துகொள்ள இயலாதவராக, தனக்குள்‌ வியந்துகொண்டிருந்தபோது, விசேஷ தேவ வரப்பிரசாத ஏவுதலால்‌, கத்தோலிக்க வேத விசுவாசத்தை ஏற்றுக்‌ கொள்ள ஆவல்‌ கொண்டார்‌.

                அர்ச்‌. லாரன்ஸ்‌, சித்ரவதைக்கான அடுக்குத்‌ தட்டில்‌ கட்டப் பட்டிருந்த போது, அக்கொடிய உபாதனை நேரத்தில்‌, ரோமானுஸ்‌, அர்ச்‌. லாரன்ஸை நோக்கி, தானும்‌ ஒரு கிறீஸ்துவனாக வேண்டும்‌ என்கிற ஆவலை தெரிவித்தார்‌. அர்ச்‌.  லாரன்ஸ்‌, கட்டவிழ்க்கப்பட்டு, சிறையில்‌ அடைக்கப்பட்டபோது, தன்னிடம்‌ இடைவிடாமல்‌, கிறீஸ்துவனாக வேண்டும்‌ என்று கேட்டுக்‌ கொண்டிருந்த ரோமானுஸிடம்‌ தண்ணீர்‌ கொண்டு வரும்படிக்‌ கூறினார்‌. அவர்‌ தண்ணீர்‌ கொண்டு வந்தபோது, அந்த தண்ணீரினால்‌, அர்ச்‌. லாரன்ஸ்‌, அவருக்கு ஞானஸ்நானம்‌ கொடுத்தார்‌. உடனே நீதியாசனத்தின்‌ முன்பாக ரோமானுஸ்‌ இழுத்துச்‌ செல்லப்பட்டார்‌. அங்கே, ரோமானுஸ்‌, எதற்கும்‌, யாருக்கும்‌ அஞ்சாமல்‌, மிகுந்த சந்தோஷத்துடன்‌, நான்‌ ஒரு கிறீஸ்துவன்‌! என்று கம்பீரமாக உரத்தக்‌ குரலில்‌ கூறினார்‌.

                உடனே, அவர்‌ மரணதண்டனை விதிக்கப்‌பட்டு, தலைவெட்டிக்‌ கொல்லப்பட்டார்‌; அர்ச்‌. லாரன்ஸ்‌ வேதசாட்சியாகக்‌ கொல்லப்படு வதற்கு முந்தின நாளன்று, அதாவது, கி.பி.258ம்‌ வருடம்‌, ஆகஸ்டு9ம்‌ தேதியன்று, அர்ச்‌. ரோமானுஸ்‌ வேதசாட்சியாகக்‌ கொல்லப்பட்டார்‌. இவருடைய பரிசுத்த சரீரம்‌ ஒரு குருவானவரால்‌ பூஜிதமாக, தைபர்‌ நதிக்குச்‌ செல்கிற பாதையினருகில்‌ உள்ள ஒரு குகையில்‌ அடக்கம்‌ செய்யப்பட்டது. பின்‌, இவருடைய பரிசுத்த அருளிக்கங்கள்‌, லூக்காவிலுள்ள அர்ச்‌.  ரோமானுஸ்‌ தேவாலயத்தின்‌ பிரதான பீடத்தின்‌ அடியில்‌ ஸ்தாபிக்கப்பட்டிருக்கும்‌ ஒரு பேழைக்கு, இடமாற்றம்‌ செய்யப்பட்டன.

வேதசாட்சியான அர்ச்‌.  ரோமானுஸே! எங்களுக்காக வேண்டிக்‌ கொள்ளும்‌!

July 27 – St. Pantaleon, அர்ச். பந்தலேயோன்

 

ஜூலை2️7ம்‌ தேதி

வேதசாட்சியான அர்ச். பந்தலேயோன் திருநாள்.

இவர் வேதசாட்சியாக கிபி 305ம் ஆண்டில் மரித்தார். இவர், நிக்கோமேதியாவைச் சேர்ந்த யுஸ்டோர்ஜியுஸ் என்கிற  ஒரு அஞ்ஞான பணக்காரரின் மகன். இவர், இவருடைய கிறீஸ்துவ தாயாரான யூபுலாவிடமிருந்து ஞான உபதேசத்தைக் கற்றுக்கொண்டார். பின்னர், இவர் கிறீஸ்துவ வேதத்தை அனுசரிப்பதை விட்டு விட்டார்! மருத்துவக் கல்வி பயின்று மருத்துவரானார். சக்கரவர்த்தி மாக்ஸிமியானுசி னுடைய குடும்ப மருத்துவரானார்; சங். ஹெர்மோலாவுஸ் என்கிற குருவானவரால், இவர் மனந்திரும்பி, மறுபடியும் கிறீஸ்துவ வேதத்தில் சேர்ந்து, வேதக்கடமைகளை அனுசரிக்கலானார்!

இவருடைய தந்தை இறந்தபிறகு, அவருடைய திரளான சொத்துக்கள், இவருக்குக் கிடைத்தன! உரோமை சாம்ராஜ்ஜியத்தின்  கீழை நாடுகளின் சக்கரவர்த்தியான தியோக்ளேஷியனுடைய காலத்தில், கிறீஸ்துவர்களுக்கு எதிரான வேதகலாபனை ஏற்பட்ட சமயத்தில், இவர் பேரில் காய்மகாரம் கொண்ட சக அலுவலர்கள், சக்கரவர்த்தி மாக்ஸிமியானுசிடம் இவர் ஒரு கிறீஸ்துவர் என்று காட்டிக்கொடுத்தனர். மாக்ஸிமியானுஸ், இவரைக் காப்பாற்ற விரும்பி, கிறீஸ்துவ வேதத்தை மறுதலித்து விடும்படி கூறினான்.

ஆனால், பந்தலேயோன், பகிரங்கமாக சக்கரவர்த்தியிடம், தனது கிறீஸ்துவ வேத விசுவாசத்தை உச்சாரணம் செய்தார்! ஆண்டவர் தான் உண்மையான சர்வேசுரன் என்பதை நிரூபிப்பதற்காக, நடக்கக் கூடாமலிருந்த ஒரு பக்கவாத நோயாளியை புதுமையாக நடக்கச் செய்தார்! இவர் இந்த புதுமையைச் செய்தபோதிலும், இவர் கிறீஸ்துவ வேதத்தில் உறுதியாக நிலைத்திருந்ததைக் கண்ட சக்கரவர்த்தி, அந்த புதுமை ஒரு மாய வித்தை என்று கூறி, இவருக்கு மரண தண்டனை விதித்தான்.

                பந்தலேயோனின் சரீரம் முதலில் நெருப்புப் பந்தங்களால் சுட்டெரிக்கப்பட்டது!அச்சமயம், நமதாண்டவர், சங். ஹெர்மோலாவுஸ் சுவாமியாரின் உருவத்தில் தோன்றி, இவருடைய சரீரத்தில் ஏற்பட்டிருந்த தீக்காயங்களை குணப்படுத்தி, இவரை திடப்படுத் தினார்! தீப்பந்தங்கள் இதன்பின் அணைக்கப்பட்டன! பிறகு, காய்ச்சப்பட்ட ஈயம் இருந்த ஒரு கொப்பறையினுள் இவரைத் தூக்கிப் போட்டனர்! அச்சமயம், மறுபடியும், நமதாண்டவர், சங். ஹெர்மோலாவுஸ் சுவாமியாரின் உருவத்தில் இவருடன் கூட கொப்பறையினுள் இறங்கினார்! அடியில் மூட்டப்பட்டிருந்த நெருப்பு அவிந்துபோனது! உள்ளேயிருந்த காய்ச்சப்பட்டிருந்த ஈயம் குளிர்ந்து போனது! பின், இவரை, ஒரு பெரிய கல்லைக் கட்டி, கடலில் எறிந்தனர்! ஆனால், அந்த கல் கடலில் மூழ்காமல் மிதந்தது!  அதன்பின், காட்டு மிருகங்கள் மத்தியில் இவரை விட்டனர்.  எல்லா கொடிய மிருகங்களும், இவர்பேரில் மயங்கி, இவருடைய பாதத்தண்டையில் உட்கார்ந்து கொண்டன!  இவர் அந்த மிருகங்களை ஆசீர்வதித்தபிறகே, அவை, இவரை விட்டுச் சென்றன!               

ஒரு பெரிய சக்கரத்தில் இவர் கயிறுகளால் பிணைக்கப்பட்டுக் கட்டப்பட்டார். ஆனால், கயிறுகள் அறுந்துபோயின! சக்கரம் உடைந்துபோனது! இவரை இறுதியாக தலையை, ஒரு வாளால் வெட்டிக்கொல்ல முயற்சித்தபோது, அந்த வாள் வளைந்துபோனது! இதைக் கண்ட கொலைஞர்கள் மனந்திரும்பி கிறீஸ்துவர்களாயினர்!  தன்னைக் கொல்ல வந்த கொலைஞர்களை மன்னிக்கும்படி, இவர் பரலோகத்தை நோக்கி ஜெபித்தார்! சர்வேசுரனிடம் அதற்காகக் கெஞ்சி மன்றாடினார்! இதனாலேயே இவர் “சகல இரக்கத்தையுடையவர்” என்கிற அர்த்தமுள்ள “பந்தேலேயோன்” பெயரினால் அழைக்கப் படுகிறார்! பின்னர், தனக்கு மகா பாக்கியமான வேதசாட்சிய மரணம் கிடைக்கும்படியாக ஆண்டவரிடம் கெஞ்சி மன்றாடினார்! அதன் பின்னரே, இவர் தலைவெட்டிக் கொல்லப்பட்டார்! மகிமையான வேத சாட்சிய மரணத்தினுடைய கிரீடத்தைப் பெறும் பாக்கியத்தை அடைந்தார்! 

கீழை நாடுகளில், அர்ச். பந்தலேயோன், மகா பெரிய வேதசாட்சியாகவும், புதுமை செய்கிறவராகவும் வணங்கப்படுகிறார்! மத்திய நூற்றாண்டுகளில், மருத்துவர்களும் தாதியர்களும் இவரைப் பாதுகாவலராகக் கொண்டு இவர் மீது விசேஷ பக்தி பற்றுதல் கொண்டிருந்தனர்! மேலும்,திருச்சபையின் உதவியாளர்களான பதினான்கு வேதசாட்சிகளில் இவரும் ஒருவராயிருந்தார்! ஆதிக்காலத்திலிருந்தே, இவருடைய பரிசுத்த இரத்தம் அடங்கிய ஒரு சிறிய குப்பி, கான்ஸ்டான்டிநோபிளிலுள்ள ஒரு தேவாலயத்தில், ஒரு அருளிக்கப்பேழையாக பூஜிதமாகக் காப்பாற்றப்பட்டு, வணங்கப்பட்டு வந்தது!

அர்ச். பந்தலேயோன் திருநாள் அன்று, வருடந்தோறும், திடப்பொருளாக உறைந்து போயிருந்த இரத்தம், புதுமையாக, திரவ நிலையை அடைந்து, நுரையுடன் காணப்படும்! இவருடைய மற்ற பரிசுத்த அருளிக்கங்கள் பாரீஸிலுள்ள அர்ச். டென்னிஸ் தேவாலயத்தில் ஸ்தாபிக்கப்பட்டிருக்கின்றன! இவருடைய பரிசுத்தத் தலை, லியோன்ஸ் நகரில் பூஜிதமாக வணங்கப்படுகிறது!✝

வேதசாட்சியான அர்ச். பந்தலேயோனே! எங்களுக்காக வேண்டிக் கொள்ளும்!

 

July 28 - ST. NAZARIUS & ST. CELSUS, அர்ச்‌. நசாரியுஸ், அர்ச்‌. செல்சுஸ்

 ஜூலை 2️8‌ தேதி

 வேதசாட்சிகளான அர்ச்‌. நசாரியுஸ், அர்ச்‌. செல்சுஸ்‌ திருநாள்‌. 

              

அர்ச்‌. நசாரியுஸ்‌, பக்திப்பற்றுதலுள்ள  அர்ச்‌.  பெர்பெத்துவம்மா ளினுடைய மகன்‌ உரோமையில்‌ பிறந்தார்‌. இவருடைய தந்தை உரோமை இராணுவத்தின்‌ அதிகாரியாக இருந்தார்‌. அவர்‌ இன்னும்‌ அஞ்ஞானியாக இருந்தார்‌. நசாரியுஸ்‌, 9வது வயதில்‌ கத்தோலிக்க வேதத்தில்‌ சேர்ந்தார்‌. இவருக்கு பின்னாளில்‌ பாப்பரசரான அர்ச்‌. லீனுஸ்‌ ஞானஸ்நானம்‌ கொடுத்தார்‌. இவருடைய அஞ்ஞான தந்தை தன்‌ மகன்‌ நசாரியுஸ்‌ அனுசரித்த உத்தம கத்தோலிக்கப்‌ புண்ணியங்களால்‌ பெரிதும்‌ கவர்ந்திழுக்கப் பட்டார்‌: அதன்‌ காரணமாக ஆண்டவருடைய சுவிசேஷத்தையும்‌ சத்திய கத்தோலிக்க வேதத்தையும்‌ பரப்பும்படி எங்கு வேண்டுமானாலும்‌ செல்வதற்கு அனுமதித்து தன்‌ மகனை அனுப்பி வைத்தார்‌.

நசாரியுஸ்‌ உரோமாபுரிக்கு வெளியே அநேக நகரங்களுக்குச்‌ சென்று கத்தோலிக்க வேதவிசுவாசத்தையும்‌ சுவிசேஷத்தையும்‌ பரப்பி வந்தார்‌. 10 வருடங்களுக்குப்‌ பின்‌ மிலான்‌ நகரை அடைந்‌தார்‌. ஆனால்‌ அந்நகர ஆளுநன்‌, இவரை சாட்டையால்‌ அடித்து நகரை விட்டு விரட்டி விட்டான்‌. நசாரியுஸ்‌, இத்தாலியை விட்டு வெளியேறி, பிரான்ஸ்‌ நாட்டிற்குச்‌ சென்றார்‌. அங்கு ஒரு பக்தியுள்ள கிறீஸ்துவ பெண்மணி தன்‌ மகனான செல்சுஸ்‌ என்பவரை இவரிடம்‌ கூட்டி வந்தார்கள்‌. தன்‌ மகனுக்கு ஞானஸ்நானம்‌ கொடுத்து ஞான உபதேசம்‌ கற்பிக்கும்படி  கேட்டுக்கொண்டார்கள்‌.

இவரும்‌ செல்சுஸூக்கு ஞானஸ்நானம்‌ கொடுத்து ஞான உபதேசம்‌ கற்பித்து அவரை தன்‌ சீடனாக ஆக்கிக்‌ கொண்டார்‌. அநேகர்‌ அங்கு மனந்திரும்பினர்‌: இதைக்கண்ட அந்நகரின்‌ ஆளுநன்‌ நசாரியுஸையும்‌ செல்சுஸையும்‌ கைது செய்தான்‌. சித்ரவதை செய்து கொடுமைப்படுத் தினான். அந்த ஆளுநனின்‌ மனைவி ஒரு கிறீஸ்துவளாயிருந்ததால்‌ தன்‌ கணவனிடம்‌ போராடி மாசற்ற இருவருக்கும்‌ விடுதலை வாங்கித்‌ தந்தாள்‌. இனி கிறீஸ்துவ வேதத்தைப்‌ பிரசங்கிக்கக்‌ கூடாது என்கிற நிபந்தனையின்‌ பேரில்‌ இருவருக்கும்‌ விடுதலை கிடைத்தது.

நசாரியுஸ்‌ தன்‌ சீடனுடன்‌ பிரான்சை விட்டு வெளியேறி  ஆல்ப்ஸ்‌ மலைப்பிரதேசத்திலுள்ள எல்லா கிராமங்களுக்கும், எம்ப்ருன்‌ என்ற இடம்‌ வரைச் சென்று  சத்திய கத்தோலிக்க வேதத்தைப்‌ போதித்து வந்தார்‌. இங்கு ஒரு சிற்றாலயத்தைக்‌ கட்டினார்‌. பின்னர்‌ ஜெனிவா நகருக்கும்‌ அதன்‌ பின்‌ டிரவெஸுக்கும்‌ சென்றார்‌. டிரவெஸில்‌ நசாரியுஸ்‌ கைது செய்யப்பட்டு சிறையில்‌ அடைக்கப்பட்டார்‌. தன்‌ குருவைப்‌ பின்‌ பற்றி வந்த செல்சுஸ்‌ தன்‌ குருவுடன்‌ தன்னையும்‌ சிறையில் அடைக்க வேண்டும்‌ என்று கண்ணீர்‌ மல்க ஆசித்தார்‌. அதன்‌ படி அவரும்‌ சிறையிலடைக்கப்பட்டார்‌.

சில நாட்களுக்குப்‌ பின்‌ ஆளுநன்‌ இருவரையும்‌ தன்‌ முன்‌ நிறுத்தும்படி கட்டளையிட்டான்‌. இருவரையும்‌ கொடூரமாக சித்ரவதை செய்து உபத்திரவப்படுத்தினா்‌. இருவரும்‌ மாஜிஸ்திரேட்‌ முன்பாக நிறுத்தப்பட்ட போது பரலோக மகிமையின்‌ மாபெரும்‌ பிரகாசமுள்ள ஒளியினால்‌ இரு அர்ச்சிஷ்டவர்களுடைய முகங்களும்‌ ஒளிர்வதைக்‌ கண்டு கூடியிருந்த மக்கள்‌ எல்லோரும்‌ ஆச்சரியமடைந்தனர்‌! அச்சமயம்‌ அங்கு நிகழ்ந்த அதிசயங்களும்‌ புதுமைகளும்‌ அங்கிருந்த அஞ்ஞான அதிகாரிகளை அச்சமடையச்‌ செய்தன!

உடனே இருவரையும்‌ விடுவித்து. அப்பிரதேசத்திலிருந்து வெளியேறும்படி கூறினர்‌.  இருவரும்‌ மிலான்‌ நகருக்குத்‌ திரும்பி வந்தனர்‌. ஆனால்‌ விரைவிலேயே இங்கேயும்‌ கைது செய்யப்பட்டனர்‌. உரோமையின்‌ அஞ்ஞான விக்கிரகங்களை வழிபடவேண்டும்‌ என்று இருவரையும்‌ நிர்ப்பந்தித்தனர்‌. அதற்கு இருவரும்‌ மறுத்ததால்‌ சகல கொடிய உபதக்திரவங்களால்‌ இருவரையும்‌ சித்ரவதை செய்தனர் தேவ பராமரிப்பினால்‌ அந்த கொடிய சித்ரவதைகளிலிருந்து இருவரும்‌ புதுமையாகப்‌ பாதுகாக்கப்பட்டனர்‌. இதைக்கண்ட ஆளுநன்‌ இருவரையும்‌ தலைவெட்டிக்‌ கொல்லும்படி உத்தரவிட்டான்‌.

இதைக்‌ கேட்டு இருவரும்‌ சந்தோஷத்தினால்‌ ஒருவர்‌ ஒருவரை அரவணைத்துக்‌ கொண்டனர்‌. வேதசாட்சிய மகிமையை தங்களுக்கு அளித்தமைக்காகவும்‌ அதற்கான விசேஷ தேவ வரப்பிரசாதத்தை அளித்தமைக்காகவும்‌ இருவரும்‌ முழங்காலிலிருந்து மகிழ்வுடன்‌ சர்வேசுரனுக்கு நன்றி செலுத்தினர்‌. இது கி.பி.56ம்‌ வருடம்‌ கொடுங்கோலனான நீரோ உரோமையை ஆண்ட காலத்தில்‌ நிகழ்ந்தது!

 கிறீஸ்துவ உத்தமதனத்தின்‌ பெருந்தன்மையையும்‌ தயாள குணத்தையுமுடைய இவ்விரு அர்ச்சிஷ்டவர்களும்‌ தங்களுடைய பரிசுத்த இரத்தத்தை திருச்சபையின்‌ விலைமதியாத பொக்கிஷ திரவியசாலையில்‌ சேர்த்தனர்‌. இருவருடைய பரிசுத்த சரீரங்களும்‌ தனித்தனியாக உரோமை நகருக்கு வெளியே உள்ள ஒரு தோட்டத்தில்‌ அடக்கம்‌ செய்யப்பட்டன.  இந்த கல்லறைகளை, 395ம் ‌வருடம்‌, அர்ச்‌. அம்புரோசியார்‌, கண்டெடுத்து, இருவருடைய பரிசுத்த சரீரங்களையும்‌, தான்‌ அப்போஸ்தலர்களுக்குத்‌ தோத்திரமாக புதிதாகக்‌ கட்டியிருந்த தேவாலயத்தில்‌ பூஜிதமாக அடக்கம்‌ செய்தார்‌.

அச்சமயம்‌, பேய்பிடித்திருந்த ஒரு பெண்‌ புதுமையாக குணமடைந்தாள்‌. இவ்விரு அர்ச்சிஷ்டவர்களின்‌ பரிசுத்த அருளிக் கங்கள்‌ சிலவற்றை நோலாவிலுள்ள அர்ச்‌.  பவுலினுசுக்கு, அர்ச்‌.  அம்புரோசியார்‌ அனுப்பி வைத்தார்‌. அவற்றை  அர்ச்‌. பவுலினுஸ்‌ நோலாவிலுள்ள தேவாலயத்தில்‌ பூஜிதமாக ஸ்தாபித்தார்‌.  அர்ச்‌. நசாரியுஸ்‌ கல்லறையில்‌ அர்ச்சிஷ்டவருடைய பரிசுத்த தலையும்‌ பரிசுத்த சரீரமும்‌ முழுமையாகப்‌ பாதுகாக்கப்‌பட்டிருக்கிறது. ஒரு கண்ணாடி குப்பியினுள்‌ பூஜிதமாக அடைக்கப்பட்டிருக்கிற அர்ச்சிஷ்ட வருடைய பரிசுத்த இரத்தம்‌ புதுமையாக அன்று தான்‌ சிந்தப்பட்டதுபோல்‌,சிவப்பு நிறத்துடனும்‌ நுரை பொங்கியபடியும்‌ காணப்பட்டது!

வேதசாட்சிகளான  அர்ச்‌. நசாரியுஸே!  அர்ச்‌. செல்சுஸே! எங்களுக்காக வேண்டிக்‌ கொள்ளுங்கள்‌!

For more please Visit here - https://livesofsaint.blogspot.com/

 

July 29 - St. Martha, அர்ச்‌. மார்த்தம்மாள்

 

ஜூலை 29ம்‌ தேதி

அர்ச்‌. மார்த்தம்மாள்‌ திருநாள்‌

 

 அர்ச்‌.  மார்த்தம்மாள்‌, சகோதரியான அர்ச்‌.  மரிய மதலேனம்மா ளுடனும்‌, சகோதரரான அர்ச்‌. லாசருடனும்‌ ஜெருசலேமுக்கு அருகிலுள்ள பெத்தானியா என்ற கிராமத்தில்‌ வசித்ததாகவும்‌, நமதாண்டவர்‌ இம்மூவரையும்‌ சிநேகித்ததாகவும்‌, அர்ச்‌.  லூக்காஸ்‌ மற்றும்‌ அர்ச்‌. அருளப்பர்‌ சுவிசேஷங்களில் ‌(அரு 11:5) வாசிக்கிறோம்‌. தன்‌ சகோதரர்‌ லாசர்‌ இறந்தபோது, நமதாண்டவரிடம்‌ அர்ச்‌. மார்த்தம்மாள்‌ கொண்டிருந்த மாபெரும்‌ விசுவாசத்தை சுவிசேஷத்தில்‌ காண்கிறோம்‌. அச்சமயம்‌, பெத்தானியாவிற்கு ஆண்டவர்‌ வருகிறார்‌ என்று கேள்விப்பட்டதும்‌, ஆண்டவரிடம்‌ விரைந்தோடிப்போய்‌, ஆண்டவரே! தேவரீர்‌ இங்கே இருந்திருந்தால்‌, என்‌ சகோதரன்‌ இறந்திருக்க மாட்டான்‌, என்று கூறினாள்‌.

ஆண்டவர்‌ அவளிடம்‌ , “லாசர்‌ இறக்கவில்லை! அவன்‌ எழுந்திருப்பான்‌; என்னிடத்தில்‌ விசுவாசம்‌ கொண்டிருப்பவன்,‌ இறப்பினும்‌ உயிர்வாழ்வான்‌! இதை நீ விசுவசிக்கிறாயா?” என்று வினவினார்‌. அதற்கு, அவள்‌, “ஆம்‌! ஆண்டவரே! நீர்‌ கிறீஸ்து என்றும்‌, உலகத்திற்கு இறங்கி வந்த சர்வேசுரனுடைய திவ்ய குமாரன்‌ என்றும்‌ நான்‌ விசுவசிக்கிறேன்‌, என்று பதில்‌ கூறினாள்‌. ஆண்டவருக்கு, மிகவும்‌ பிரியமுள்ள இக்குடும்பத்தைப்‌ பற்றி, மறுபடியும்‌ சுவிசேஷத்தில்‌, நாம்‌ எதையும்‌ காண்கிறதில்லை! ஆனால்‌ திருச்சபையின்‌ பரிசுத்தப்‌ பாரம்பரியம்‌, இக்குடும்பத்தினா்‌, இன்னும்‌ சில சகக்‌ கிறீஸ்துவர் களுடன்‌, கி.பி.47ம்‌ வருடம்‌ ஜெருசலேமில்‌ கிறீஸ்துவர்களுக்கு எதிரான வேதகலாபனை துவங்கியபோது, யூதர்களால்‌ எந்த துடுப்பும்‌, பாய்மர மும்‌ இல்லாத ஒரு படகிலே ஏற்றப்பட்டு, மத்தியக்தரைக்கடலிலே  அனுப்பி வைக்கப்பட்டனர்‌, என்றும்‌, அது, புதுமையாக மத்தியத்‌ தரைக்கடலைக்‌ கடந்து, பிரான்சின்‌ தெற்கு துறைமுக நகரமான மார்சேல்ஸை அடைந்தது என்றும்‌ கூறுகின்றது. 

பிரான்சில்‌, அர்ச்‌. மார்த்தம்மாள்‌, பரிசுத்த ஸ்திரீகளுடன்‌ சேர்ந்து  ஒரு குழுவாக, பக்த சபையை ஏற்படுத்தி, ஜீவித்து வந்தார்கள்‌; அர்ச்‌.  மார்த்தம்மாள்‌, மாபெரும்‌ ஜெப தப பரிகார ஜீவியம்‌ ஜீவித்து வந்தார்கள்‌; யாவரும்‌ வியக்கத்தக்க ஆச்சரியத்திற்குரிய தபசினுடையவும்‌, பரி சுத்தத்தனத்தினுடையவும்‌ ஜீவியம்‌ ஜீவித்து, கி.பி.84ம்‌ வருடம்‌, பாக்கியமாய்‌ மரித்தார்கள்‌; டாராஸ்கோன்‌ என்ற இடத்தில்‌ பூஜிதமாக ஒரு கல்லறையில்‌ அடக்கம்‌ செய்யப்பட்டார்கள்‌. அருகில்‌ மலைக்‌ குகையில்‌ தபோதனராக ஜெபத்திலும்‌ தபசிலும்‌ ஜீவித்த அர்ச்‌. மரிய மதலேனம்மாளின்‌ கல்லறை, லா செயிண்ட்‌ போம்‌ என்ற இடத்தில்‌ இருக்கிறது; அர்ச்‌. லாசருஸ்‌, மார்சேல்ஸ்‌ நகரில்‌, கத்தோலிக்க திருச்சசபையை ஸ்தாபித்தவர்‌ என்று வணங்கப்படுகிறார்‌.

இவர்கள்‌ தான்‌, நமதாண்டவர்‌ தீர்க்கதரிசனமாக முன்னறிவிப்பு செய்து எச்சரித்திருந்ததன்படி, விரைவில்‌ அடுத்து வரவிருக்கும்‌ ஜெருசலேமின்‌ அழிவின்‌போது, யூதர்களாலும்‌, உரோமையர்களாலும்‌, அவசங்கை செய்யப்பட்டுவிடும்‌ என்கிற அச்சத்தினால்‌, மகா பரிசுத்த அர்ச்‌. அன்னம்மாளின்‌ பரிசுத்த அருளிக்கங்களை, இரகசியமாக பிரான்சிற்குக்‌ கொண்டு வந்தனர்‌! ஸ்பெயின்‌ நாடு, அர்ச்‌. மார்த்தம்மாளை, அந்நாட்டின்‌ பாதுகாவலராக ஏற்று மகிமைப்படுத்திக்‌ கொண்டாடி வருகிறது; ஸ்பெயின்‌ நாட்டில்‌ வில்லாயோயோசா என்ற நகரில்‌, அர்ச்‌. மார்த்தம்மாளுக்குத்‌ தோத்திர மகிமையாக, வருடந் தோறும்‌, கிறீஸ்துவர்களுடையவும்‌, மூர்‌ இனமக்‌களுடையவும்‌ திருவிழாவாகக்‌ கொண்டாடுகின்றனர்‌.

இந்த திருவிழா, 1538ம்‌ வருடம்‌, ஸாலே ஆர்ராயேஸ்‌ என்பவனுடைய தலைமையின்‌ கீழ்‌ படையெடுத்து வந்த மகமதியரி டமிருந்து அர்ச்‌. மார்த்தம்மாள்‌ இந்நகரைப்‌ புதுமையாகக்‌ காப்பாற்றி யதன்‌ ஞாபகார்த்தமாகவே, கொண்டாடப்‌படுகிறது; அச்சமயம்‌, இந்நகர மக்கள்‌, தங்கள்‌ நகரத்தை,மகமதியரிடமிருந்து காப்பாற்ற வேண்டும்‌ என்று, அர்ச்‌. மார்த்தம்மாளிடம்‌ வேண்டிக்கொண்டனர்‌. அர்ச்‌. மார்த்தம்மாள்‌, திடீரென்று ஒரு வெள்ளத்தை ஏற்படுத்தி, அதன்‌ முலம்‌ இந்நகரை தாக்க வந்த மகமதியப்‌ படையை அந்த வெள்ளத்தினுள்‌ அமிழ்ந்து மூழ்கச்செய்து, இந்நகர மக்களைக்‌ காப்பாற்றினார்கள்‌. தேவாலய மணிகளை, அர்ச்சித்து மந்திரிக்கும்‌ திருச்சபையின்‌ சடங்கின்போது,நமதாண்டவர்‌ அர்ச்‌. மார்த்தம்மாளின்‌ வீட்டிற்கு வருகிற சுவிசேஷ நிகழ்வு, வாசிக்கப்பட்டு நினைவு கூரப்படுகிறது!  ✝

அர்ச்‌. மார்த்தம்மாளே! எங்களுக்காக வேண்டிக்கொள்ளும்‌!