November 27 - Our Lady of Miraculous Medal

 

நவம்பர்‌ 2️7ம் தேதி

அற்புதப்‌ பதக்கம்‌ என்கிற புதுமை மாதா சுரூபத்தின்‌ திருநாள்‌

 

1830ம்‌ வருடம்‌, நவம்பர்‌ 27ம்‌ தேதியன்று, பாரீஸ்‌ நகரின்‌ ரூ டூ பாக்கிலுள்ள பிறர்சிநேகக்‌ கன்னியர்‌ மடத்தில்‌, மாலை ஜெபதியான நேரத்தில்‌, அர்ச்‌. கத்தரீன்‌ லபூரேவிற்கு, மகா பரிசுத்த தேவமாதா காட்சியளித்தார்கள்‌. மகா பரிசுத்த தேவமாதா, நீள வட்டமான ஒரு சட்டத்தினுள்‌ தம்‌மையேக்‌ காண்பித்தபடி, பூகோள உருண்டையின்‌ மேல்‌ நின்றவிதமாகக் காட்சி அளித்தார்கள்‌; தேவமாதா பல வித்தியாசமான வண்ண நிறங்களிலான மோதிரங்களை அணிந்திருந்தார்கள்‌; அந்த மோதிரங்களிலிருந்து பிரகாசமான ஒளிக்‌ கதிர்கள்‌, கீழே இருந்த பூமியின்‌ பூகோள உருண்டையின்‌ மீது பாய்ந்தன! தேவமாதா தோன்றிய நீள வட்டத்தின்‌ சட்டத்தைச்‌ சுற்றிலும்‌, “ஓ! பாவ மில்லாமல்‌ உற்பவித்த அர்ச்‌. மரியாயே! அடைக்கலமாக உம்மை நாடி வரும்‌ எங்களுக்காக வேண்டிக்கொள்ளும்‌!” என்கிற ஜெபத்தினுடைய வார்த்தைகள்‌ தோன்றின!

கத்தரீன்‌ லபூரே, இப்பரலோகக்‌ காட்சியை கவனித்துக்கொண்டிருந்த போது, காட்சியில்‌ தேவமாதாவைச்‌ சுற்றிலுமிருந்த நீள வட்டத்தின்‌ சட்டம்‌ சுற்றத்‌ துவக்கியது! அடுத்த பக்கத்தில்‌, 12 நட்சத்திரங்களைக்‌ கொண்ட ஒரு நீள வட்டம்‌ தோன்றியது;அதனுள்‌ சிலுவை நாட்டப்பட்டிருந்த “M” என்ற எழுத்தும்‌ அந்த எழுத்தின்‌ அடியில்‌ முட்களால்‌ முடி சூட்டப்பட்டிருந்த ஆண்டவரின்‌ மகா பரிசுத்த திவ்ய திரு இருதயமும்‌, வாளால்‌ ஊடுருவப்பட்ட மகா பரிசுத்த தேவமாதாவின்‌ மாசற்ற இருதயமும்‌ தோன்றின! அப்போது, தேவமாதாவின்‌ திருக்கர விரல்களிலிருந்த ஒருசில மோதிரங்களிலிருந்து, ஏன்‌ ஒளிக்கற்றை வெளியேறாமல்‌ இருக்கிறது? என்று, அர்ச்‌.கத்தரீனம்மாள்‌ கேட்டார்‌. அதற்கு, மகா பரிசுத்த தேவமாதா, வெளியே புறப்பட்டு வராத அந்த ஒளிக்கற்றைகள்‌, மக்கள்‌ கேட்பதற்கு மறந்த தேவ வரப்பிரசாதங்களைச்‌ சுட்டிக்‌ காண்பிக்கின்றன! என்று பதிலளித்தார்கள்‌.  பின்னர்‌, மகா பரிசுத்த தேவமாதா, அர்ச்.‌ கத்தரீனம்மாளிடம்‌, காட்சியில்‌ கண்டபிரகாரம்,‌ ஒரு பதக்கம்‌ செய்யப்பட வேண்டுமென்றும்‌, அதை எல்லோரும்‌ கழுத்தில்‌ அணிந்து கொள்ளவேண்டுமென்றும்‌, கத்தரீனம்மாளுடைய  ஆன்ம இயக்குனர்‌ சுவாமியாரின்‌ வழிகாட்டுதலின்படி, இந்த பதக்கம்‌ செய்யப்‌ படவேண்டுமென்றும்‌, கூறினார்கள்‌.  உறுதியான நம்பிக்கையுடன்‌ இந்த பதக்கத்தை அணிகிறவர்கள்‌ எல்லோரும்‌, மாபெரும்‌ தேவ வரப்பிரசாதங்களைப்‌ பெற்றுக்கொள்வார்கள்‌, என்று மகா பரிசுத்த தேவமாதா கூறினார்கள்‌.  தேவமாதா கூறியபடி எல்லாவற்றையும்‌, அர்ச்‌. கத்தரீன்‌ லபூரே செய்து முடித்தார்‌; கத்தரீனுடைய ஆன்ம இயக்குனர்‌ சுவாமியார்‌, இரண்டு வருடம்‌ கழித்து, கத்தரீனுடைய அடையாளத்தை வெளிப்படுத்தாமல்‌, மகா பரிசுத்த தேவ மாதாவின்‌ காட்சியைப்பற்றிய விவரத்தை, பாரீஸ்‌ அதிமேற்றிராணியாரிடம்‌ தெரிவித்தார்‌.  தேவமாதாவின்‌ அற்புதப்பதக்கத்தின்‌ காட்சி, திருச்சபையால்‌ அங்கீகரிக்‌கப்பட்டது; அற்புதப்பதக்கங்கள்‌, ஏட்ரியன்‌ வாச்செட்‌ என்ற பொற்கொல்லரால்‌ வடிவமைக்கப்பட்டு, தயாரிக்கப்பட்டன!  அர்ச்‌. கத்தரீன்‌, தேவமாதா காட்சிபெற்ற அந்த மடத்தின்‌ சிற்றாலயம்‌, பாரீஸிலிருக்கும்‌ ரூ டூ பாக்கிலுள்ள பிறா்சிநேகக்‌ கன்னியர்‌ சபையின்‌ தாய்‌ மடத்தில்‌ உள்ளது. இந்த சிற்றாலயத்தில்‌ தான்‌, அர்ச்‌.கத்தரீன்‌ லபூரே மற்றும்‌ பிறர்சிநேகக்‌ கன்னியர்‌ சபையின்‌ இணை ஸ்தாபகரான அர்ச்‌.லூயிஸ்‌ தே மரி லாக்கினுடைய அழியாத பரிசுத்த சரீரங்கள்‌ பூஜிதமாக அடக்கம்‌ செய்யப்பட்டு, பொது வணக்கத்திற்காக வைக்கபட்டிருக்கின்றன. உலகெங்கிலுமிருந்து, மக்கள்‌ இந்‌நாள்‌ வரை, திருயாத்திரையாக, இங்கு வந்து ஜெபித்துச்‌ செல்கின்றனர்‌.

“ஜென்மப்‌ பாவமில்லாமல்‌ உற்பவித்த அர்ச்‌.மரியாயே! பாவிகளுக்கு அடைக்கலமே! இதோ உமது அடைக்கலமாக ஓடி வந்தோம்‌! எங்கள்‌ பேரில்‌ இரக்கமாயிருந்து, எங்களுக்காக உமது திவ்ய திருக்குமாரனிடம்‌ வேண்டிக்கொள்ளும்‌!”

November 26 - St. Sylvester

 

நவம்பர் 26ம் தேதி

ல்வெஸ்டிரின் துறவற சபையின் ஸ்தாபகரும், மடாதிபதியுமான

அர்ச்.சில்வெஸ்டர் கொஸ்ஸோலினி

 

இவர், இத்தாலியில் லொரேட்டோவிலிருந்து 14 மைல் தூரத்திலுள்ள ஓசிமோ என்ற இடத்தில் 1177ம் வருடம் ஒரு உயர் குடும்பத்தில் பிறந்தார். இவர் சட்டக்கல்வியையும், வேதஇயலையும், முறையே, பொலோஞாவிலும், பதுவாவிலும் உள்ள பல்கலைக்கழகங்களில் பயின்றார். பின்னர், ஓசிமோ கதீட்ரல் தேவாலய நிர்வாக அதிபர் குழுவின் உறுப்பினராக நியமிக்கப்பட்டார். இவர் தன் ஜீவிய காலத்தில் மிகவும் வியந்து பாராட்டிப்போற்றி வந்த ஒரு மனிதனுடைய  சிதைந்து போய்கொண்டிருந்த பிரேதத்தைக் கண்டு, மாபெரும் அதிர்ச்சியடைந்தார்; உடனே, ஒரு துறவியாக வேண்டும், என்று தீர்மானித்தார். அந்த மனிதனுடைய மாபெரும் அழகிற்காகவும், அவன் நிறைவேற்றியிருந்த அரிய காரியங்களுக்காகவும், அவனை மிகப்பெரிய மனிதனாகக் கருதி பாராட்டி வந்திருந்தார். விரைவிலேயே, சில்வெஸ்டர், வஞ்சகமான இவ்வுலகத்தின் மாயையான மகிமையைப் பற்றி புரிந்து கொண்டார்; உலக மகிமை, வீணான மகிமையாக, விரைவிலேயே மறைந்து போகக் கூடிய மகிமை! என்பதைப் புரிந்துகொண்டார். எனவே, தனது 40வது வயதில், அந்நகரை விட்டு இரகசியமாக வெளியேறினார்;ஓசிமோ நகரிலிருந்து 30 மைல் தூரத்திலிருந்த  ஒரு பாலைவனத்தில் ஏகாந்தமாகத் தங்கி இளைப்பாறினார்.

                1231ம் வருடம், சில்வெஸ்டிரின் துறவற சபையை ஸ்தாபித்தார். அன்கோனா பிரபுவிற்கு சொந்தமான பிரதேசத்திலுள்ள ஃபேப்ரியானோ விலிருந்து இரண்டு மைல் தொலைவிலுள்ள ஃபானோ என்ற மலையின் மேல் ஒரு துறவற மடத்தை தன் சபையினருக்காகக் கட்டினார்.

                இந்த மடத்தில், அர்ச்.ஆசீர்வாதப்பர் துறவற சபையின் விதிமுறைகளை முழுமையாக அனுசரிக்கும்படி, ஏற்பாடு செய்தார். 1248ம் வருடம், இவர் தனது துறவற சபைக்கான பாப்பரசரின் அங்கீகாரத்துடனான அனுமதியை, அச்சமயம் லியோன்ஸ் நகரில் தங்கியிருந்த 4ம் இன்னசென்ட் பாப்பரசரிடமிருந்து பெற்றுக்கொண்டார். இவர், இத்தாலியில், 25 துறவற மடங்களைக் கட்டினார்; தபசு , ஜெபம், என்கிற இவர் அனுசரித்த இரு பக்திமுயற்சிகளுடைய இரட்டை உணர்வினுடைய சந்ததியாக தனது சீடர்களை விட்டுச் சென்றார்; 1267ம் வருடம், இவர் தனது 90வது வயதில், 1267ம் வருடம், நவம்பர் 26ம் தேதியன்று பாக்கியமாய் மரித்தார். இவருடைய கல்லறையில் ஏராளமான புதுமைகள் நிகழ்வதற்கு சர்வேசுரன் திருவுளமானார்; இவர் அனுசரித்து வந்த இடைவிடாத கடின தபசின் காரணமாக, இவருடைய பெயர், உரோமை வேதசாட்சிகளுடைய பெயர் பட்டியலில் சேர்க்கப்பட்டது.

அர்ச்.சில்வெஸ்டரே! எங்களுக்காக வேண்டிக்கொள்ளும்!

November 22 - St. Cecilia

 

நவம்பர்‌ 2️2️

வேதசாட்சியும் கன்னிகையுமான

 அர்ச். செசலியம்மாள்‌

(அழியாத சரீரமுடைய முதல்‌ அர்ச்சிஷ்டவள்‌)

கி.பி.177ம்‌ வருடம்‌ கத்தோலிக்க வேத விசுவாசத்திற்காக கொடூர உபத்திரவங்கள்‌ பட்டு, வேதசாட்சியாக மரித்த இந்த இளம்‌ அர்ச்சிஷ்ட வள்‌, பரிசுத்த கற்பு என்கிற மகா அழகிய நறுமண மலர்களான கிறீஸ்துவ கன்னிகையர்களும்‌ வேதசாட்சிகளுமானவர்களில்‌ மிக முக்கியமான வேதசாட்சியாக திகழ்கின்றார்‌.

அர்ச்‌ செசிலியம்மாள்‌, உரோமை நகரின்‌ மிகவும்‌ பிரசத்திபெற்ற பத்ரீசியாரின்‌ மகளாகப்‌ பிறந்தார்‌.இவர்‌ மட்டுமே, இவருடைய குடும்பத்தில்‌ கிறீஸ்துவளாக இருந்தார்‌. சுரங்கக் கல்லறைக் கோவிலில்‌ நிகழ்ந்த கத்தோலிக்க ஜெபவழிபாடுகளில்‌ செசிலியம்மாள்‌ கலந்துகொண்டார்‌. செசிலியம்மாளுடைய பெற்றோர்கள்‌, ஒன்றில்‌, மகள்‌ மேல்‌ இரக்கப்பட்டு, அதற்கு அனுமதித்திருக்க வேண்டும்‌; அல்லது, மகள்‌ மேல்‌ அக்கறையில்லாதவர்களாக இருந்திருக்க வேண்டும்‌.

இளமையிலேயே அர்ச்‌. செசிலியம்மாள், தன்‌ கன்னிமையை ஆண்டவருக்கு அர்ப்பணித்து ஒப்புக்கொடுத்திருந்தார்‌; பரிசுத்த கற்பின்‌ வார்த்தைப்பாட்டை எடுத்திருந்தார்‌. இருப்பினும்‌, செசிலியின்‌ பெற்றோர்கள்‌, அஞ்ஞானியான ஒரு இளம்‌ உயர்குடிமகனான வலேரியனுக்கு திருமணம்‌ செய்து வைத்தனர்‌. திருமண நாளன்று மாலையில்‌, திருமண விருந்திற்கான இசை இன்னும்‌ காற்றில்‌ மிதந்து கொண்டிருந்த நேரத்தில்‌, உரோமாபுரியின்‌ உயர்குடி மகளும்‌ அறிவிலும்‌ அழகிலும்‌ சிறந்து விளங்கிய இளம்‌ கன்னிகையுமான செசிலியம்மாள்‌, தனது கன்னிமை விரதத்துவத்தைப்‌ புதுப்பித்தார்‌.

அதே திருமண நாளின்‌ மாலை நேரத்தில்‌, வலேரியனிடம்‌, செசிலி, தான்‌ கன்னிமை விரதத்துவத்தின்‌ வார்த்தைப்பாட்டை சர்வேசுரனுக்கு அளித்திருப்பதாகவும்‌, அதற்காக ,தன்னை தனது காவல்‌ சம்மனசானவர்‌ பாதுகாப்பதாகவும்‌ கூறினார்‌. மேலும்‌, வலேரியனிடம்‌, செசிலியம்மாள்‌, “நீங்கள்‌ என்னிடம்‌ அணுகி வந்தால்‌, அது, என்‌ காவல்‌ சம்மனசானவருக்குக்‌ கோபத்தைத்‌ தூண்டக்கூடும்‌; அதன்‌ காரணமாக, உம்மை பழிவாங்கும் படியாக அவரின்‌ தாக்குதல்களுடைய அடிகளுக்கு நீர்‌ ஆளாகக்‌ கூடும்‌!” என்று கூறினார்‌.

அதற்கு வலேரியன்‌, “நான்‌ உன்னுடைய காவல்‌ சம்மனசானவரைக்‌ காண்பேனாகில்‌, உன்னுடைய விருப்பத்தின்படி நான்‌ நடந்துகொள்வேன்!”‌ என்று கூறினார்‌. அதற்கு செசிலியம்மாள்‌, “நீர்‌, கத்தோலிக்கனாக மாறுவீர்‌ என்றால்‌, நிச்சயமாக என்‌ காவல்‌ சம்மனசானவரைக்‌ காண்பீர்!”, என்று வாக்குறுதி அளித்தார்‌;

அதன்‌ பின்‌,வலேரியனை, உர்பன்‌ பாப்பரசரிடம்‌ செசிலியம்மாள்‌ கூட்டிச்‌ சென்றார்‌; ஞானஸ்நானம்‌ பெறும்படியாக, அன்றிரவே, தன்னிடம்‌ வந்த வலேரியன்‌ மட்டில்‌, பரிசுத்த பாப்பரசர்‌ வெகுவாக சந்தோஷமடைந்தார்‌; ஞான உபதேசத்தைக்‌ கற்பித்தார்‌; ஞானஸ்நானத்தையும்‌ அன்றிரவே பாப்பரசர்‌, வலேரியனுக்கு அளித்தார்‌; கிறீஸ்துவராக வலேரியன்‌ தனது மாளிகைக்குத்‌ திரும்பி வந்தார்‌; தன்‌ இல்லத்தை அடைந்ததும்‌, வலேரியன்‌, செசிலியம்மாளுடைய காவல்சம்மனசானவரை மெய்யாகவே கண்டார்‌; காவல்‌ சம்மனசானவர்‌ தன்‌ இருகரங்களிலும்‌ இரண்டு ரோஜா மலர்‌ கிரீடத்தை வைத்திருப்பதைக்‌ கண்டார்‌; வலேரியனுக்கும்‌, செசிலியம்மாளுக்கும்‌, அவர்களுடைய தலைகளில்‌, காவல்‌ சம்மனசானவரே, அந்த ரோஜா மலர்கிரீடங்களைச்சூடினார்‌.

விரைவிலேயே அவர்கள்‌ இருவரும்‌ வேதசாட்சிய முடியைப்‌ பெறப்‌ போகிறார்கள்‌ என்பதை, அர்ச்‌.செசிலியம்மாள்‌ உடனே புரிந்துகொண்டார்‌. அச்சமயம்‌, சர்வேசுரனிடமிருந்து எந்த தேவ வரப்பிரசாதத்தையும்‌ வலேரியன்‌ பெற்றுக்கொள்ளலாம்‌. சர்வேசுரன்‌ வலேரியன்‌ மட்டில்‌ மிகவும்‌ மகிழ்வடைந்திருக்கிறார்‌, என்று, அறிவிக்கப்பட்டது. உடனே, வலேரியன்‌, தான்‌ பெற்ற இந்த தேவ வரப்பிரசாதத்தை, தன்‌ சகோதரனான திபூர்ஷியுசும்‌ பெற்றுக்கொள்ள வேண்டும்‌ என்று விரும்பி, அந்த விருப்பத்தை விண்ப்பித்தார்‌. உடனே வலேரியனுடைய விருப்பத்தின்படி, அவருடைய சகோதரனான திபூர்ஷியுசும்‌ கத்தோலிக்கனாக மனந்திரும்பினார்‌. இரு சகோதரர்களும்‌, பெரிய செல்வந்தர்களாக இருந்ததால்‌, வேத சாட்சிய மரணத்தினால்‌, தந்தையை, தாயை, பெற்றோர்களை, மகன்களை இழந்துபோன கிறீஸ்துவக் குடும்பங்களுக்கு பொருள்‌ உதவி செய்வதிலும்‌, அவர்களை ஆதரிப்பதிலும்‌, வேதசாட்சிகளாக உயிரிழந்த கிறீஸ்துவர்களை அடக்கம்‌ செய்வதிலும்‌ ஈடுபட்டு, இறுதியில்‌ அதே வேதசாட்சிகளாக மரிப்பதற்கும்‌ துணிந்தனர்‌.

அதன்‌ விளைவாக, விரைவிலேயே அவர்கள்‌ இருவரும்‌ சிறை பிடிக்கப்பட்டனர்‌; இவ்விரு சகோதரர்களும்‌ வேதசாட்சிகளாகக்‌ கொல்லப்பட வேண்டிய இடத்திற்குக்‌ கூட்டிச்‌ சென்ற இராணுவ அதிகாரியான மாக்சிமுசையும்‌ மனந்திருப்பினர்‌; வழியில்‌ இவர்கள்‌ மெய்யான சர்வேசுரனைப்‌ பற்றிய ஞான உபதேசத்தைக்‌ கேட்ட மாக்சிமுஸ்‌ மனந்திரும்பி கிறீஸ்துவ விசுவாசத்தை ஏற்றுக்கொண்டார்‌. இவர்கள்‌ இருவரையும்‌ கொல்வதற்கான அதிகாரியான மாக்‌சிமுஸ்‌, மரண தண்டனையை ஒரு நாளைக்குத்‌ தள்ளிப்போட்டு விட்டு, இவர்கள்‌ இருவரையும்‌ தன்‌ வீட்டிற்குக் கூட்டிச் சென்றார்‌; தன் குடும்பத்தாருடனும்‌ வீட்டாருடனும்‌, சேர்ந்து ஞானஸ்நானம்‌ பெற்று, கிறீஸ்துவன்‌ ஆனார்‌. வலேரியன்‌, திபூர்ஷியுஸ்‌ மற்றும்‌ அவர்களால்‌ கிறீஸ்துநாதரிடம்‌ கூட்டிவரப்பட்ட மாக்சிமுஸ்‌ ஆகிய மூவரும்‌ தலைவெட்டி வேதசாட்சிகளாகக் கொல்லப்பட்டனர்‌.

அச்சமயம்‌, செசிலியம்மாள்‌, கைதுசெய்யப்பட்டு, உயிருடன்‌ எரித்து கொல்லப்படும்படியான தண்டனைத்‌ தீர்ப்பை அடைந்தார்‌. ஆனால்‌, நெருப்பு செசிலியம்மாளைத்‌ தீண்டவில்லை! ஆதலால்‌, தலைவெட்டிக்‌ கொல்லப்பட்டார்‌. ஆனால்‌, கொலைக்காரன்‌, செசிலியம்மாளின்‌ கழுத்தை நடுங்கியபடி வெட்டியதால்‌, கழுத்து முழுமையாக வெட்டுப்படாமல்‌ அரைகுறையாக வெட்டப்பட்டு, செசிலியம்மாள்‌; கீழே கிடந்தார்‌; இரண்டு நாட்கள்‌ உயிருடன்‌ இருந்து, கொடிய அவஸ்தைப்‌ பட்டார்‌.

அர்ச்‌. செசிலியம்மாளுடைய பரிசுத்த அழியாத சரீரம்‌, பிரடக்ஸ்டாடுஸ்‌ என்‌ற சுரங்கக்‌ கல்லறையில்‌, 600 வருடங்கள்‌ கழித்து, கி.பி.822ம்‌ வருடம்‌, முதலாம்‌ பாஸ்கல்‌ பாப்பரசரால்‌ கண்டுபிடிக்கப்பட்டது. 1599ம்‌ வருடம்‌ மறுபடியும்‌, அர்ச்‌.செசிலியம்மாளின்‌ பரிசுத்த சரீரம்‌ அழியாமல் இருப்பது கண்டுபிடிக்கப்பட்டது!

அர்ச்‌.செசிலியம்மாளே! அர்ச்‌.வலேரியனே! அர்ச்‌.திபூர்ஷியஸே! எங்களுக்காக வேண்டிக்கொள்ளுங்கள்‌!

November 23 - St. Clement I

 

நவம்பர்‌ 23ம் தேதி

வேதசாட்சியான

அர்ச்‌. முதலாம்‌ கிளமென்ட்‌ பாப்பரசர்‌

 

          🌹கிளமென்ட்‌ யூதமதத்திலிருந்து கிறிஸ்துவராக மனந்திரும்பியவர்‌; அர்ச்‌. இராயப்பருக்கும்‌ அர்ச்‌. சின்னப்பருக்கும்‌ சீடராயிருந்தார்‌; அர்ச்‌. சின்னப்பர்‌ பிலிப்பியருக்கு எழுதிய நிரூபத்தில்‌, இவரைப்‌ பற்றி எழுதியிருக்கிறார்‌: “அவர்கள்‌ கிளமெந்த்‌ என்பவரோடும்‌, எனக்கு உதவிசெய்த மற்றவர்களோடும்‌,சுவிசேஷத்தைப்பற்றி என்னோடு கூட உழைத்தவர்கள்”‌ (பிலிப்‌ 4:3).

அனிக்ளிதுஸ்‌ பாப்பரசருக்குப்‌ பிறகு அர்ச்‌. கிளமென்ட்‌ கி.பி. 88ம்‌ வருடத்தில்‌, பாப்பரசரானார்‌. கொடுங்கோலனான டிராஜன்‌ என்கிற உரோமைச்‌ சக்கரவர்த்தியினால்‌, இவர்‌, தண்டிக்கப்பட்டு, கிரீமியா நாட்டிற்கு நாடு கடத்தப்பட்டார்‌. அங்கு ஏற்கனவே தண்டனையை அனுபவித்து வந்த 2000 கத்தோலிக்கர்களுக்கு, அர்ச்‌. கிளமென்ட்‌ பாப்பரசர்‌ ஆறுதலாயிருந்தார்‌;

அவர்களுக்கு இவர்‌ அளித்த அறுதல்‌ வார்த்தைகள்‌: “சர்வேசுரன்‌, உங்களுடன்‌ கூட இருக்கும்படியாக, இந்த இடத்திற்கு என்னை அனுப்பியதன்‌ மூலம்‌ , வேதசாட்சிய முடியின்‌ மகிமையில்‌ உங்களுடன்‌ கூட பங்கேற்‌கும் படியான தேவ வரப்பிரசாதத்தை எனக்கு அருளியிருக்கின்றார்‌; ஆனால்‌ அதற்கு நான்‌ தகுதியற்றவனாயிருக்கிறேன்.”‌

அர்ச்‌.கிளமென்ட்‌, கி.பி.100ம்‌ வருடம்‌, கழுத்தில்‌ நங்கூரம்‌ கட்டப்பட்டவராக கடலில்‌ மூழ்கடிக்கப்பட்டுக் கொல்லப்பட்டார்‌. கப்பல்‌ படையினருக்கும்‌ கல்லை வெட்டுபவர்களுக்கும்‌ அர்ச்‌. கிளமென்ட்‌ பாதுகாவலராயிருக்கிறார்‌.

அர்ச்‌.கிளமென்ட்டே! எங்களுக்காக வேண்டிக்கொள்ளும்‌!

November 24. - St. John of the Cross

நவம்பர்‌ 24ம் தேதி

காட்சி தியானியும், ஸ்துதியரும், வேதபாரகருமன

அர்ச்‌. சிலுவை அருளப்பர்‌ 

ஜூவான்‌ தே யெப்பெஸ்‌ ஆல்வாரெஸ்‌,1542ம்‌ வருடம்‌,ஜூன்‌ 24ம்‌ தேதி,ஸ்பெயின்‌ நாட்டிலுள்ள ஃபோன்டிவெரோஸ்‌ என்ற இடத்தில்‌ பிறந்தார்‌. பிரான்சிஸ்‌ தே யெப்பெஸ்‌ என்ற ஸ்பெயின்‌ நாட்டின்‌ உயர்குடியைச்‌ சேர்ந்த பிரபுவின்‌ மகனாக அருளப்பர்‌ பிறந்தார்‌. ஸ்பெயினிலுள்ள மெதீனா தே காம்போஸ்‌ என்ற நகரிலுள்ள கார்மெல்‌ மடத்தில்‌,1563ம்‌ வருடம்‌,அருளப்பர்‌,தன்‌ 23வது வயதில்‌,இளந்துறவியாகச்‌ சேர்ந்தார்‌,1567ம்‌ வருடம்‌,25வது வயதில்‌ குருப்பட்டம்‌ பெற்றார்‌. 1568ம்‌ வருடம்‌,கார்மெல்‌ சபையின்‌ புகழ்பெற்ற காட்சி தியானியான அர்ச்‌.அவிலா தெரசம்மாள்‌,கார்மெல்‌ சபையின்‌ ஆரம்பகால கண்டிப்பான தபசுகளின்‌ விதிமுறைகளை மறுபடியும்‌ அனுசரிக்கும்படியாக,கார்மெல்‌ சபையினுள்‌ கொண்டு வரும்படியாக,கார்மெல்‌ சபையை சீர்திருத்தும்‌ அலுவலில்‌ அர்ச்‌. சிலுவை அருளப்பருடைய உதவியுடன்‌ ஈடுபட்டார்கள்‌. 

1569ம்‌ வருடம்‌,டூரூவெலோ என்ற இடத்தில்‌,அர்ச்‌.சிலுவை அருளப்பர்‌,முதல்‌ சீர்திருத்தப்பட்ட கார்மெல்‌ சபை மடத்தைத்‌ துவக்கினார்‌. ஆனால்‌ இவர்‌,அர்ச்‌.அவிலா தெரசம்மாளுடன்‌ சேர்ந்து கொண்டு வந்த சீர்திருத்தத்தினால்‌,கார்மெல்‌ துறவற சபையினுள்‌ துறவியரிடையே உட்பூசல்‌ ஏற்பட்டது. அதன் காரணமாக 1576ம்‌ வருடம்‌,இவரை சிறை வைத்தனர்‌. 1577ம்‌ வருடம்‌,அர்ச்‌. சிலுவை அருளப்பரை,டொலடோவில்‌ மறுபடியும்‌ ஒரு இருண்ட அறையில்‌ அடைத்து வைத்தனர்‌. அங்கு தான்‌,அர்ச்‌.சிலுவை அருளப்பர்‌,உலகப்புகழ் பெற்றதும்‌,இவருடைய மிகச்சிறந்‌தவையுமான காட்சிதியானக்‌ கட்டுரைகள்‌ அல்லது ஞானப்‌ பாடல்களை,எழுதினார்‌: “ஆத்துமத்தின்‌ உன்னத சங்கீதம்”‌ஆத்துமத்தின்‌ இருண்ட இரவு”சிநேகத்தினுடைய உயிருள்ள சுவாலை” ஆகிய ஞான சங்கீதங்களை எழுதினார்‌.

“ஆத்துமத்தின்‌ இருண்ட இரவு” என்கிற தனது காட்சிதியானக்‌ கட்டுரையில்,ஆத்துமமானது,சகலத்தின்‌ மீதும்‌ கொண்டிருக்கும்‌ சகல பற்றுதல்களையும் ஒவ்வொன்றாகத்‌ துறந்துவிட்டு சகலத்தையும்‌ கடந்து,இறுதியாக எவ்வாறு,நமதாண்டவர்‌ சிலுவையில்‌ அறையப்பட்டதையே அதனுடைய இறுதி மகிமையாக,அனுபவிக்கிறது,என்பதைப்‌ பற்றி விவரிக்கின்றார்‌. எட்டு சரணங்களுடைய பாடலாக இதை இயற்றியிருக்கிறார்‌.தன்‌ மகா நேசமானவருடன்‌ ஒன்றிணைந்து ஐக்கியமாவதற்கு முன்பாக, விசுவாசத்தினுடைய இருண்ட இரவைக்‌ கடந்து செல்லும்போது தான்‌, கொண்டிருந்த பாக்கியமானதும்‌ துணிகரமானதுமான வீரத்துவத்தைப்‌ பற்றி,ஆத்துமம்‌ பாடுகிற பாடலாக இதை எழுதியுள்ளார்‌. 1568ம் ‌வருடம்‌,ஆகஸ்டு மாதம்‌ அருளப்பர்‌ சிறையிலிருந்து புதுமையாக வெளியேறி தப்பிச்‌ சென்றார்‌. பின்னாளில்‌ 1585ம்‌ வருடத்திலிருந்து 1587ம்‌ வருடம்‌ வரை, இவருக்கு ஆண்டலூசியா பிராந்தியத்தின்‌ கார்மெல்‌ துறவற சபையில்‌ உதவி பொதுதலைமை அதிபர்‌ பதவி அளிக்கப்‌ பட்டது. இவருடைய இறுதி காலத்தில்‌,மறுபடியும்‌,சீர்திருத்தப்பட்ட கார்மெல்‌ சபைத் துறவியரிடையே கருத்து வேறுபாடும்‌ பிரிவினையும்‌ ஏற்பட்டது,அர்ச்‌.சிலுவை அருளப்பர்‌ தனிமையில்‌ ஜெப தபத்தில்‌ ஈடுபட்டு முழுமையான ஏகாந்த ஜீவியம்‌ ஜீவித்தார்‌. உபேடா என்ற இடத்தில்‌ 1591ம்‌ வருடம், டிசம்பர்‌ 14ம்‌ தேதியன்று,தன்‌ 49வது வயதில்‌,அர்ச்‌. சிலுவை அருளப்பர்‌ பாக்கியமாக மரித்தார்‌. செகொவியா நகரில்‌ அடக்கம்‌ செய்யப்பட்டார்‌.1726ம்‌ வருடம்‌ இவருக்கு அர்ச்சிஷ்டப்‌ பட்டம்‌ அளிக்கப்பட்டது.இவருடைய பரிசுத்த சரீரம்‌ அழியாத சரீரமாக இந்நாள்‌ வரை வணங்கப்பட்டு வருகிறது. 11ம்‌ பத்திநாதர்‌ பாப்பரசர்‌,1926ம்‌ வருடம்‌,இவரை திருச்சபையின்‌ வேதபாரகராகப்‌ பிரகடனம்‌ செய்தார்‌. மாபெரும்‌ கத்தோலிக்கக்‌ காட்சி தியானிகளில்‌ மிகச்சிறந்த காட்சி தியானியாகவும்‌, ஞான சங்கீதங்கள்‌ எழுதும்‌ இஸ்பானிய கவிஞர்களில்‌ மிகச்சிறந்த கவிஞராகவும்‌,அர்ச்‌.சிலுவை அருளப்பர்‌ திகழ்கின்றார்‌. திருச்சபையின்‌ மிகச்‌ சிறந்த வேதபாரகராகவும்‌,இஸ்பானிய தேசத்தின்‌ துறவற மடங்களின்‌ சீர்திருத்தவாதியாகவும்‌,சீர்திருத்தப்பட்ட கார்மெல்‌ சபையின்‌ தியான துறவற சபையின் ‌இணை ஸ்தாபகராகவும்‌ திகழ்கின்றார்‌.

ஸ்துதியரும்,காட்சிதியானியும்,வேதபாரகருமானஅர்ச்‌.சிலுவை அருளப்பரே! எங்களுக்காக வேண்டிக்கொள்ளும்‌

Nov. 25 - St. Catherine of Alexandria

நவம்பர்‌ 25ம் தேதி

வேதசாட்சியான

அர்ச்‌.அலெக்சான்டிரியா கத்தரீனம்மாள்

அலெக்சான்டிரியா நகரத்தில்‌,ஒரு உயர்குடி பதித குடும்பத்தில்‌,கி.பி.287ம்‌ வருடம்‌,கத்தரீனம்மாள்‌ பிறந்தார்‌. இவருக்கு 18 வயதான போது,இவரும்‌,இவருடைய தாயாரும்‌,கத்தோலிக்க வேதத்தைத்‌ தழுவினர்‌: கத்தரீனம்மாள்‌,கிறீஸ்துவர்களைக்‌ கொல்வதைக்‌ குறித்து,உரோமாபுரியின்‌ சக்கரவர்த்தியான மாக்சென்ஷியுஸை,வெளிப்படையாகக்‌ கண்டித்தார்‌. சக்கரவர்த்தியும்‌,அவனுடைய அஞ்ஞான கடவுள்களும்‌ போலியான கடவுள்கள்‌,என்று பகிரங்கமாகக்‌ கூறினார்‌. 

இதைக்‌ கேட்டதும்‌,சக்கரவர்த்தி,கத்தரீனம்மாள்‌ மேல்‌ கடுங்கோபம்‌ கொண்டான்‌.உடனே, 50 அஞ்ஞான தத்துவ இயல்‌ ஆசிரியர்களை வரவழைத்து,கத்தரீனம்மாளுடன்‌ வேதத்தைப்‌ பற்றி தர்க்கவாதம்‌ செய்ய ஏற்பாடு செய்தான்‌. அதைக்‌ கேட்பதற்காக மாபெரும்‌ பார்வையாளர்‌ கூட்டம்‌ சேர்ந்தது. சக்கரவர்த்தி,மாபெரும்‌ கோபவெறியுடன்‌,தன்‌ பத்திராசனத்தில்‌ அமர்ந்தான்‌. அவனைச்‌ சுற்றிலும்‌,அரண்மனையைச்‌ சேர்ந்த சகலரும்‌ அமர்ந்தனர்‌. தர்க்க வாதத்தில்‌ அஞ்ஞான தத்துவ இயல்‌ ஆசிரியர்கள்‌ படுதோல்வியை அடைந்தனர்‌. அதே சமயம்‌,சிறுபெண்ணான கத்தரீனுடைய ஞானத்தைக்‌ கண்டு அதிசயப்பட்டனர்‌கத்தரீனம்மாள்‌ கூறிய சத்திய வேதத்தினுடைய ஞான உபதேசத்தினால்‌ கவர்ந்திழுக்கப்பட்டவர்களாக 50 அஞ்ஞான தத்துவ இயல்‌ ஆசிரியர்களும்‌,மனந்திரும்பி,கத்தோலிக்க வேதத்தில்‌ சேர்ந்தனர்‌. அதனால்‌ அவர்கள்‌ மேல்‌ ஆத்திரமடைந்த மாக்சென்ஷியுஸ்‌அவர்களை உயிருடன்‌ எரித்துக்கொல்லும்படிச்‌ செய்தான்‌.அவர்கள்‌ அனைவரும்‌ வேதசாட்சிகளாக மரித்தனர்‌! 

இதைக்‌ கண்ட மாக்சென்ஷியுஸ்‌,கத்தரீனம்மாள்‌,கத்தோலிக்க வேதத்‌தை மறுதலித்தால்‌,அரசியின்‌ பதவியை அளிப்பதாகவும்‌,தானே திருமணம்‌ செய்து கொள்வதாகவும்‌,கூறினான்‌.ஆனால்‌,அதை கத்தரீனம்மாள்‌ உடனே மறுத்து விட்டார்‌. தன்னை திருமணம்‌ செய்துகொள்ள மறுத்துவிட்ட கத்தரீனை,சக்கரவர்த்தி,சாட்டையால்‌ அடித்து,சிறையில்‌ அடைக்கச்‌ செய்தான்‌.

சிறையிலிருந்தபோது,அர்ச்‌.கத்தரீனம்மாள்‌,சக்கரவர்த்தி்யுடைய மனைவியையும்‌,உரோமப்‌ படைவீரர்கள்‌ 200 பேரையும்‌,அவர்களின்‌ தலைவனையும்‌ மனந்திருப்பி கத்தோலிக்க வேதத்தில்‌ சேரும்படிச்‌ செய்தார்‌.இதைக்‌ கேள்விப்பட்ட சக்கரவர்த்தி,அவர்கள்‌ எல்லோரையும்‌ கொன்றுபோடச்‌ செய்தான்‌.இவர்கள்‌ அனைவரும்‌ வேதசாட்சிகளாக மரித்தனர்‌! பின்னர்‌,கத்தரீனம்மாளை சித்ரவதைச்‌ செய்வதற்காகவே,கொடியவனான சக்கரவர்த்தி,கூரான கத்திகளும்‌,கூர்மையான இரும்புக்‌ கம்பிகளும்‌ பொருத்தப்பட்ட ஒரு சக்கரத்தைக்‌ கண்டுபிடித்திருந்தான்‌. அந்த சக்கரத்துடன்‌ சேர்த்து கத்தரீனம்மாளை பிணைத்துக்‌ கட்டினான்‌.அதைக்‌ கண்ட சகல மக்களும்‌ அஞ்சி நடுங்கினர்‌.ஆனால்‌,அந்த சக்கரம்‌ ஓடத் துவக்கியபோது,புதுமையாக அதன்‌ இணைப்புகள்‌ எல்லாம்‌ பிரிந்து,உடைந்து சிதறியது!அச்சமயம்‌ அதிலி ருந்த 3000 கூர்மையான கம்பிகள்‌ நான்கு பக்கமும்‌ சிதறி,சுற்றி நின்று வேடிக்கை பார்த்துக்‌ கொண்டிருந்த 3000 அஞ்ஞானிகள்‌ மேல்‌ பாய்ந்து,ஊடுருவிக்‌ குத்திக்‌ கொன்றது! இதைக்கண்டு கோபவெறியுடன்‌ மூர்க்கனான சக்கரவர்த்தி கி.பி.310ம்‌ வருடம்‌,கத்தரீனம்மாளை தலையை வெட்டிக்கொல்லும்படி கட்‌டளையிட்டான்‌. கத்தரீனம்மாளுடைய சரீரத்தை,பிறகு,சம்மனசுகள்‌,சீனாய்‌ மலை அடிவாரத்திலிருந்த ஒரு சந்நியாசிகள்‌ மடத்திற்குக்‌ கொண்டு வந்தனர்‌. 

சிலுவைப்போர்களின்‌ சமயத்தில்‌,அர்ச்‌.அலெக்சான்டிரியா கத்தரீனம்மாள்‌ மீதான பக்தியை அனுசரிப்பது எல்லா கிறீஸ்துவர்களிடமும்‌ இன்றியமையாத ஒரு பக்தி முயற்சியாக பிரபலமடைந்திருந்தது! மாணவர்களுடையவும்‌, ஆசிரியர்களுடையவும்‌ ,நூலக ஆசிரியர்களுடையவும்‌,வக்கீல்களுடையவும்‌ பாதுகாவலராக அர்ச்‌. அலெக்சான்டிரியா கத்தரீனம்மாள்‌ திகழ்கிறார்‌. 

திருச்சபையின்‌ 14 பரிசுத்த உதவியாளர்களான அர்ச்சிஷ்டவர்களுள்‌ அர்ச்‌. அலெக்சான்டிரியா கத்தரீனம்மாளும்‌ ஒருவர்‌.அதிலும்‌ குறிப்பாக ஜெர்மனியிலும்‌,ஹங்கேரியிலும்‌,இவர்‌ விசேஷ பாதுகாவலராக வணங்கப்படுகிறார்‌! அர்ச்‌.ஜோன்‌ ஆஃப்‌ ஆர்க்கிற்கு,அதிதூதரான அர்ச்‌.மிக்கேல்‌ சம்மனசானவரும்‌,அர்ச்‌.அலெக்சான்டிரியா கத்தரீனும்‌ பரலோக ஆலோசகர்களாகத் திகழ்ந்தனர்‌,என்பது குறிப்பிடத்தக்கது!

அர்ச்‌.அலெக்சான்டிரியா கத்தரீனம்மாளே! எங்களுக்காக வேண்டிக்கொள்ளும்‌